ରାଉରକେଲା: ବେଲଗାମ ପରିବା ଦର। ଏହାସହ ଦାଉ ସାଜୁଛି ଅଦିନିଆ ବର୍ଷା। ସବୁ ଭିତରେ ନାକେଦମ ହେଉଛି ଚାଷୀ, ଖୁଚୁରା ବେପାରୀ ଓ ଗ୍ରାହକ। ଏପରି ବିଭିନ୍ନ ଅସୁବିଧା କାରଣରୁ ଚଳିତ ବର୍ଷ ଗ୍ରାହକ ତଟକା ପନିପରିବାକୁ ଶସ୍ତା ବା ପକେଟକୁ ସୁହାଇବା ଭଳି ଦରରେ ପାଇ ପାରୁନାହିଁନ୍ତି।
ଚାଷୀର ଅମଳ ସମୟରେ ଅଦିନିଆ ବର୍ଷା ପରିବା କ୍ଷେତକୁ ଉଜାଡି ଦେବା ସହ ଚାଷୀଙ୍କ ମେରୁଦଣ୍ଡକୁ ଭାଙ୍ଗିଦେଇଛି। ଯାହାଫଳରେ ପୁନର୍ବାର ଚାଷକରି ଦୁଇ ପଇସା ରୋଜଗାର ଆଶାରେ ଚାରା ରୋପଣ କରିଛି ଚାଷୀ। ରାଉରକେଲାର ବିଭିନ୍ନ ଗ୍ରାମୀଣ ଅଞ୍ଚଳରେ ନଭେମ୍ବର ମାସ ସୁଦ୍ଧା ଚାଷୀ ବଗିଚାରେ ଯାହାକୁ ଯେତେ ପରିବା ଫଳିଥାଏ। ଏଥିରେ ଚାଷୀ ନିଜର ଗୁଜୁରାଣ ମେଣ୍ଟାଇବା ସହ ବିକ୍ରିବଟା କରିଥାଏ। ସବୁ ବର୍ଷ ଟମାଟୋ ଦର କେଜିକୁ 5, କୋବି 5 ରୁ 8ଟଙ୍କା ରହିବା ସହିତ ଅନ୍ୟ ପରିବାର ଦାମ କମିଯାଏ।
ହେଲେ ଏବର୍ଷ କୋବିର ଦାମ କିଲେ ପ୍ରତି 80 ଟଙ୍କା ରହିଥିବା ବେଳେ 60 ରୁ 40 ଟଙ୍କା ଅନ୍ୟ ପରିବାର ଦର ରହିଛି। ସେଥିମଧ୍ୟରୁ କିଛି ଚାଷୀଙ୍କ ହୋଇଥିବା ଚାଷକୁ ରାଜ୍ୟ ଅନ୍ୟସ୍ଥାନକୁ ରପ୍ତାନୀ କରାଯାଉଛି। ହେଲେ ଗାଁ ଗହଳିରେ ପରିବା ଦର ଆକାଶ ଛୁଆଁ ହେବାସହ ସିଧା ଗୃହିଣୀଙ୍କ ରୋଷେଇ ହାଣ୍ଡିକୁ ମାଡ ଦେଇଛି।
ଦୁର୍ଗା ପୂଜା ସମୟରେ ଅଦିନିଆ ବର୍ଷାରେ 3 ଥର ପରିବାର ନଷ୍ଟ ହେବା ପରେ ଚାଷୀ ଅନ୍ୟତ୍ର କାମ କରିବା ପାଇଁ ବାହାରି ଗଲେ। ବର୍ତ୍ତମାନ ଯେଉଁ କେତେକ ଚାଷୀ ବିଳମ୍ବରେ ଭଗବାନଙ୍କ ଭରସାରେ ଚାଷ ଆରମ୍ଭ କରିଛନ୍ତି ସେମାନଙ୍କ ଫସଲ ଅମଳ ହେଲେ ଗ୍ରାହକ ସୁଲଭ ଦରରେ ପରିବା ପାଇବେ ବୋଲି ଆଶା।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
