ରାଉରକେଲା: ସହରରେ ଆସନ୍ତା ଦୁର୍ଗା ପୂଜା ପାଇଁ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଛି । ଏହି ପ୍ରସ୍ତୁତି ବୈଠକରେ ପାନପୋଷ ଉପଜିଲ୍ଲାପାଳ ବିଶ୍ଵଜିତ ମହାପାତ୍ର, ରାଉରକେଲା ଅତିରିକ୍ତ ଜିଲ୍ଲାପାଳ ଯାଦୁଲ୍ଲା ବିଜୟ ଓ ବିଭିନ୍ନ ପୂଜା କମିଟିର କର୍ମକର୍ତ୍ତାମାନେ ଯୋଗ ଦେଇଥିଲେ । ଏହି ବୈଠକରେ ଶୃଙ୍ଖଳା, ଟ୍ରାଫିକ ଓ ବିଭିନ୍ନ ପ୍ରସଙ୍ଗରେ ଆଲୋଚନା କରାଯାଇଥିଲା । ଆଲୋଚନା ସମୟରେ ବିଭିନ୍ନ ରାସ୍ତାମାନରେ ଏଲଆଣ୍ଡଟି ଦ୍ବାରା ନିର୍ମାଣ କାର୍ଯ୍ୟ ଚାଲିଥିବାରୁ ଏହାକୁ ଗମନାଗମନ ଯୋଗ୍ୟ କରିବାକୁ ଅତିରିକ୍ତ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି । ଏହା ସହ ବିଜୁଳି ଓ ପାଣିର ଯୋଗାଣକୁ ସୁନିଶ୍ଚିତ କରିବାକୁ ୱେସ୍କୋ ତଥା ଆରଏସପିକୁ ନିର୍ଦ୍ଦେଶ ଦେଇଛନ୍ତି ।
ଦୁର୍ଗାପୂଜା ଅବସରରେ ମଣ୍ଡପ ଓ ମଣ୍ଡପ ବାହାରେ ସିସିଟିଭି ଲଗାଇବାକୁ ବାଧ୍ୟତାମୂଳକ କରିବାକୁ ଏହି ବୈଠକରେ କୁହାଯାଇଛି । ଏହା ସହ ପୂଜା କମିଟି ପକ୍ଷରୁ ବହୁ ସଂଖ୍ୟାରେ ସ୍ବେଚ୍ଛାସେବୀ ନିୟୋଜିତ କରାଯାଇ ମଣ୍ଡପ ବାହାରେ ଥିବା ଭିଡକୁ ନିୟନ୍ତ୍ରଣ କରିବାକୁ ବୈଠକରେ କୁହାଯାଇଛି ।
ରାଉରକେଲାରେ ଦୁର୍ଗାପୂଜା ସମୟରେ କୌଣସି ଅସୁବିଧା ନ ହେବା ପାଇଁ ପ୍ରଶାସନ ପକ୍ଷରୁ ପୋଲିସ ଅଧିକାରୀ, ବିଦ୍ୟୁତ ବିଭାଗ ଓ ପୂଜା କମିଟି କର୍ମକର୍ତ୍ତା ମାନଙ୍କୁ ନେଇ ସମନ୍ବୟ ରକ୍ଷା କରିବା ପାଇଁ ନିବେଦନ କରାଯାଇଛି ।
ରାଉରକେଲାରୁ ରାଜେନ୍ଦ୍ରନାଥ ମିଶ୍ର, ଇଟିଭି ଭାରତ
