ପୁରୀ: ଚନ୍ଦନ ଯାତ୍ରା ଓ ଅକ୍ଷୟ ତୃତୀୟାକୁ ନେଇ ଶ୍ରୀମନ୍ଦିର ନୀତି ନିର୍ଘଣ୍ଟ ହୋଇଛି । ଶ୍ରୀମନ୍ଦିର ପରିଚାଳନା କମିଟି ସଦସ୍ୟଙ୍କ ସହ ମୁଖ୍ୟ ପ୍ରଶାସକ, ନୀତି ପ୍ରଶାସକ ଓ ଉପମୁଖ୍ୟ ପ୍ରଶାସକଙ୍କୁ ନେଇ ବସିଥିବା ବୈଠକରେ ଏନେଇ ନିଷ୍ପତ୍ତି ନିଆଯାଇଛି । ଏହା ସହ ଚନ୍ଦନ ଯାତ୍ରା ପାଇଁ ପଞ୍ଚ ମହାଦେବ ମନ୍ଦିରର ସେବାୟତଙ୍କୁ ନେଇ ମଧ୍ୟ ବୈଠକ ହୋଇଛି ।
ଆସନ୍ତା ମେ 8ତାରିଖ ଅକ୍ଷୟ ତୃତୀୟା ଦିନରୁ ଶ୍ରୀକ୍ଷେତ୍ରରେ ଆରମ୍ଭ ହେବ ଚନ୍ଦନ ଯାତ୍ରା । 21ଦିନ ବ୍ୟାପୀ ନରେନ୍ଦ୍ର ପୁଷ୍କରିଣୀରେ ନୂତନ ଚାପ ବା ଡଙ୍ଗାରେ ଠାକୁର ଜଳକ୍ରୀଡା କରିବେ । ଆଉ ଏଥିପାଇଁ ନରେନ୍ଦ୍ର ପୁଷ୍କରିଣୀରେ ରଖାଯାଇଥିବା ନନ୍ଦା, ଭଦ୍ରା ଓ ବୈଜୟନ୍ତୀ ଚାପକୁ ପାଣିରୁ ଉପରକୁ କଢାଯାଇଛି। ପରମ୍ପରା ଅନୁଯାୟୀ ଚୈତ୍ର ପୁର୍ଣ୍ଣିମା ଅବସରରେ ଏହି ଚାପ ବା ଡଙ୍ଗାକୁ ଜଳରୁ ବାହାରକୁ ଅଣାଯାଇଛି । ଭୋଇ ସେବକଙ୍କ ଦ୍ୱାରା ଏହି କାର୍ଯ୍ୟ ସମ୍ପାଦିତ ହୋଇଥିବାବେଳେ ଶୁକ୍ରବାର 5ଟି ଯାକ ଚାପକୁ ସଫା କରାଯାଇଛି।
ପଞ୍ଚ ମହାଦେବ ବିମାନରେ ଆସିବା ବେଳେ ରାସ୍ତାରେ ଅନେକ ସମସ୍ୟା ଦେଖାଦେଇଥାଏ । ଯାହାକୁ ନେଇ ସେବାୟତଙ୍କ ସହ ଆଲୋଚନା କରିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ । ଅନ୍ୟପଟେ ରାସ୍ତାରେ ବିଦ୍ୟୁତ ତାରକୁ ଉପରକୁ ଉଠେଇବା, ରାସ୍ତାଘାଟକୁ ପରିଷ୍କାର କରିବା, ଖରାକୁ ନେଇ ବିମାନ ଆଗରେ ପାଣି ପକାଇବାର ବ୍ୟବସ୍ଥା କରିବା ପାଇଁ ସେବାୟତ ମୁଖ୍ୟ ପ୍ରଶାସକଙ୍କୁ ଅନୁରୋଧ କରିଛନ୍ତି।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
