ପୁରୀ: ୟୁକ୍ରେନ ଫସି ରହିଛନ୍ତି ପୁରୀର ଡାକ୍ତରୀ ଛାତ୍ରୀ ଚନ୍ଦ୍ରିକା ମିଶ୍ର । ଚିନ୍ତାରେ ଭୋକଶୋଷ ଭୁଲି ଝିଅର ଆସିବା ବାଟକୁ ଚାହିଁ ରହିଛନ୍ତି ବାପାମାଆ । ଋଷିଆ ୟୁକ୍ରେନ ମଧ୍ୟରେ ଯୁଦ୍ଧ ଚାଲିଥିବା ବେଳେ ହଜାରହଜାର ଭାରତୀୟ ଛାତ୍ରଛାତ୍ରୀ ଏବେ ୟୁକ୍ରେନରେ ଫସି ରହିଛନ୍ତି । କିଛି ଛାତ୍ରଛାତ୍ରୀଙ୍କୁ ସରକାର ଉଦ୍ଧାର କରିଛନ୍ତି । ଏହାସତ୍ତ୍ବେ ଏବେ ବି ହଜାରହଜାର ଛାତ୍ରଛାତ୍ରୀ ଏବେ ଉଦ୍ଧାର ଅପେକ୍ଷାରେ ରହିଛନ୍ତି ।
ବିଶେଷ କରି ୟୁକ୍ରେନର ଖାର୍କିଭ ସହରରେ ଥିବା ଭାରତୀୟ ଛାତ୍ରଛାତ୍ରୀଙ୍କୁ ଉଦ୍ଧାର କରାଯାଇ ପାରୁନାହିଁ । ଉକ୍ତ ଅଞ୍ଚଳରେ ଋଷିଆ ଓ ୟୁକ୍ରେନ ମଧ୍ୟରେ ତୀବ୍ର ସଂଘର୍ଷ ଚାଲିଥିବାରୁ ଫସି ରହିଥିବା ଭାରତୀୟ ଛାତ୍ରଛାତ୍ରୀ ନାନା ସମସ୍ୟା ଭୋଗୁଛନ୍ତି । ସେମାନଙ୍କ ମଧ୍ୟରେ ସାମିଲ ରହିଛନ୍ତି ପୁରୀର ଡାକ୍ତରୀ ଛାତ୍ରୀ ଚନ୍ଦ୍ରିକା ମିଶ୍ର । ସେ ଖାର୍କିଭ ସହରରେ ରହି ପଢ଼ୁଥିଲେ ।
ପୁରୀ ବଡ଼ଶଙ୍ଖ ନିକଟ ସଂଗ୍ରାମ କ୍ଲବ ଲେନ୍ର ବାସିନ୍ଦା ମାଧବ ମିଶ୍ର ଓ ସୌଭାଗ୍ୟଲକ୍ଷ୍ମୀ ମିଶ୍ରଙ୍କ ଝିଅ ହେଉଛନ୍ତି ଚନ୍ଦ୍ରିକା ମିଶ୍ର । ସେ ଗତ 2017 ମସିହାରୁ ୟୁକ୍ରେନରେ ରହି ଡାକ୍ତରୀ ପାଠ ପଢୁଛନ୍ତି । ଚନ୍ଦ୍ରିକା ଏବେ ଖାର୍କିଭ ସହର ଛାଡି ଏକ ହସ୍ପିଟାଲରେ ଆଶ୍ରୟ ନେଇଛନ୍ତି । ଏକ ହଜାରରୁ ଅଧିକ ଛାତ୍ରଛାତ୍ରୀ ଏବେ ସେଠାରେ ରହିଛନ୍ତି । ଭାରତ ସରକାର ଏହି ବ୍ୟବସ୍ଥା କରିଥିବା ସେ କହୁଥିବା ବେଳେ ବର୍ତମାନ ସ୍ଥିତିରେ ସେ ସୁରକ୍ଷିତ ଅନୁଭବ କରୁ ନାହାନ୍ତି । ସେହିପରି ଖାଦ୍ୟ ପାନୀୟର ଘୋର ଅଭାବରୁ ସମସ୍ୟା ଆହୁରି ଦ୍ଵିଗୁଣିତ ହେବାର ଆଶଙ୍କା ରହିଛି । ଚନ୍ଦ୍ରିକା ଏବେ କଣ କରିବେ ସେନେଇ ଅନିଶ୍ଚିତତାରେ ରହିଛନ୍ତି ।
ସେପଟେ ଚନ୍ଦ୍ରିକାଙ୍କ ପରିବାର ଲୋକେ ଏବେ ଭୋକ ଶୋଷ ଭୁଲି ଯାଇଛନ୍ତି । ଏକମାତ୍ର ଝିଅକୁ ଡାକ୍ତର କରିବା ସ୍ୱପ୍ନ ନେଇ ତାଙ୍କୁ ପରିବାର ଲୋକ ବିଦେଶରେ ଛାଡିଥିଲେ । କିନ୍ତୁ ବର୍ତ୍ତମାନ ଯୁଦ୍ଧ ପରିସ୍ଥିତି ଯୋଗୁଁ ଚନ୍ଦ୍ରିକାଙ୍କୁ ଉଦ୍ଧାର କରାଯାଇ ପାରୁନାହିଁ । ଚିନ୍ତାରେ ଦିନ କାଟୁଛନ୍ତି ଚନ୍ଦ୍ରିକାଙ୍କ ପରିବାର ଲୋକ । ପରିବାର ଆଖିରୁ ଲୁହ ଶୁଖୁନି । ସବୁବେଳେ ଚନ୍ଦ୍ରିକାଙ୍କ ସୁରକ୍ଷା ନେଇ ବାପା,ମାଆ, ସମ୍ପର୍କୀୟ ମହାପ୍ରଭୁ ଶ୍ରୀଜଗନ୍ନାଥଙ୍କ ଶରଣାପନ୍ନ ହୋଇଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
