ପୁରୀ:ଶ୍ରୀମନ୍ଦିର ଦକ୍ଷିଣ ଦ୍ବାରରେ ଥିବା ପଞ୍ଜାବୀ ମଠକୁ ସୋମବାର ପୋଲିସ ସିଲ କରିଛି । ମଠ ପରିସରରେ ନିଶା କାରବାରକୁ ନେଇ ପଞ୍ଜାବୀ ମଠ ଉପରେ ଅଭିଯୋଗ ଆସିବା ପରେ ଏହି କାର୍ଯ୍ୟନୁଷ୍ଠାନ ପୁରୀ ପୋଲିସ ନେଇଛି । ସୋମବାର ସନ୍ଧ୍ୟା ସୁଦ୍ଧା ମଠ ଖାଲି କରିବାକୁ ପୋଲିସ ନିର୍ଦ୍ଦେଶ ଦେଇଥିଲା।
ହଠାତ ଖାଲି କରିବା ନିର୍ଦ୍ଦେଶକୁ ନେଇ ମଠ କର୍ତ୍ତୃପକ୍ଷ ଅସନ୍ତୋଷ ବ୍ୟକ୍ତ କରିଛନ୍ତି । ଏଠାରେ ପ୍ରତିଦିନ ମନ୍ଦିରରେ ଠାକୁର ପୂଜା ସମେତ ବିଦ୍ୟାର୍ଥୀଙ୍କୁ ଶିକ୍ଷା ଦିଆଯାଏ । ସିଲ ପରେ କେମିତି ଏ ସବୁ ପରିଚାଳିତ ହେବ ବୋଲି ମଠ କର୍ତ୍ତୃପକ୍ଷ ପ୍ରଶ୍ନ ଉଠାଇଛନ୍ତି ।
ସେହିପରି ମଠରେ ଅସାମାଜିକ ଲୋକ ଆସି ନିଶା ସାମଗ୍ରୀ ସେବନ କରୁଥିବା ଅନେକ ଥର ମଠ ପକ୍ଷରୁ ପୋଲିସ ନିକଟରେ ଅଭିଯୋଗ କରାଯାଇଥିଲେ ମଧ୍ୟ ପୋଲିସ କୌଣସି ପଦକ୍ଷେପ ନେଇ ନ ଥିଲା । ଫଳରେ ଅସାମାଜିକ ଲୋକ ଆସି ମଠରେ ଆଡ୍ଡା ଜମାଇ ବିଭିନ୍ନ ନିଶାଦ୍ରବ୍ୟ ସେବନ କରୁଥିଲେ।
ଉକ୍ତ ଅସାମାଜିକ ଲୋକଙ୍କ ବିରୋଧରେ ପୋଲିସ କାର୍ଯ୍ୟାନୁଷ୍ଠାନ ନନେଇ ମଠକୁ ସିଲ କରିବା ଠିକ ନୁହେଁ ବୋଲି ମଠର ତତ୍ତ୍ବବଧାରକ କହିଛନ୍ତି। ସେହିପରି ଯଦି ମଠ ସିଲ କରାଯାଉଛି ଉପଯୁକ୍ତ ଥଇଥାନ କରାଯିବା ଉଚିତ ବୋଲି ମଠ ପକ୍ଷରୁ କୁହାଯାଇଛି। ପଞ୍ଜାବୀ ମଠ ଶ୍ରୀମନ୍ଦିର ଦକ୍ଷିଣ ଦ୍ବାରରେ ଅବସ୍ଥିତ ଥିବା ବେଳେ ଶ୍ରୀମନ୍ଦିରର ବିଭିନ୍ନ ସେବା ସହିତ ଏହି ମଠ ଜଡିତ ରହିଛି।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
