ପୁରୀ:ଆଜି ପବିତ୍ର ଦୀପାବଳି ଓ ପୟା ଶ୍ରାଦ୍ଧ । ମର୍ତ୍ତ୍ୟମଣ୍ତଳକୁ ଆସିଥିବା ପିତୃ ପୁରୁଷମାନେ ଆଜି ସ୍ବର୍ଗଲୋକକୁ ବିଦାୟ ନେଉଥିବାରୁ ଶ୍ରୀକ୍ଷେତ୍ରରେ ପିଣ୍ତଦାନର ପରମ୍ପରା ରହିଛି । କୋରୋନା କଟକଣା ଯୋଗୁଁ ଜିଲ୍ଲା ବାହାର ଲୋକଙ୍କୁ ପୁରୀ ଆସିବା ମନା ଥିବାବେଳେ ପୁରୀ ବାସିନ୍ଦାମାନେ ଶ୍ରୀମନ୍ଦିର ଉତ୍ତର ଦ୍ବାର ନିକଟରେ ସାମାଜିକ ଦୂରତା ରଖି କେଵଳ ଶ୍ରାଦ୍ଧ କର୍ମ କରିଛନ୍ତି ।
ଶ୍ରୀମନ୍ଦିର ଆଗରେ ବଡ଼ ବଡୁଆ ଡାକ ଏବଂ କାଉଁରିଆ କାଠି ଜାଳିବା ନିଷେଧ କରାଯାଇଛି । ବଡ଼ ବଡ଼ୁଆ ହୋ, ଅନ୍ଧାରରେ ଆସ, ଆଲୁଅରେ ଯାଅ, ଗଙ୍ଗା ଯାଅ, ଗୟା ଯାଅ, ଶ୍ରୀକ୍ଷେତ୍ର ଯାଅ, ବାଇଶି ପାହାଚେ ଗଡ଼ ଗଡ଼ଉ ଥାଅ । ଆଜି ପବିତ୍ର ଦୀପାବଳୀ ଅମାବାସ୍ୟା ତିଥିରେ ପ୍ରଦୀପ ପ୍ରଜ୍ବଳନ ସହ ପିତୃ ପୁରୁଷଙ୍କୁ ବିଦାୟ ଦେବାର ବେଳ । ତେବେ କୋଭିଡ ନିୟମ ଓ ପ୍ରଶାସନର କଟକଣା ଯୋଗୁଁ ଶ୍ରୀମନ୍ଦିର ସମ୍ମୁଖରେ ଆଜି ଶ୍ରଦ୍ଧାଳୁଙ୍କ ମୁହଁରୁ ଶୁଣିବାକୁ ମିଳିନଥିଲା ବଡବଡୁଆ ଡାକ ।
ବିଶେଷ କରି ଶ୍ରୀକ୍ଷେତ୍ରରେ ଶ୍ରାଦ୍ଧ ଦେବା ସହ କାଉଁରିଆ କାଠି ଜାଳି ଏହି ଦିନକୁ ପାଳନ କରିବାକୁ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମ ହୋଇଥାଏ । କିନ୍ତୁ ଚଳିତବର୍ଷ କୋରୋନା କଟକଣା ଯୋଗୁଁ ଶ୍ରଦ୍ଧାଳୁମାନେ କାଉଁରିଆ ନଜାଳି ଶ୍ରୀମନ୍ଦିର ଉତ୍ତର ଦ୍ବାର ନିକଟରେ କେବଳ ଶ୍ରାଦ୍ଧ ଓ ପିଣ୍ତ ଦାନ କରିଛନ୍ତି । ଅନ୍ୟପଟେ ଶ୍ରୀମନ୍ଦିରରେ ଆଜି ମହାପ୍ରଭୁଙ୍କର ଅମାବାସ୍ୟା ତିଥିରେ ସାଗର ବିଜେ ନୀତି ଅନୁଷ୍ଠିତ ହେବ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
