ନିଆଳି : ଟଙ୍କା ପାଇଁ ଫିଲ୍ମ ଷ୍ଟାଇଲରେ ମୁଣ୍ଡ ଜାମିନ ରଖିଥିଲେ ଅପହରଣକାରୀ । ଦେଢ଼ ଲକ୍ଷ ଟଙ୍କା ଦାବି କରି ଯୁବକକୁ ଅପହରଣ କରିଥିଲେ । ପୁରୀ ଜିଲ୍ଲା ନିମାପଡ଼ା ଜୟଶ୍ରୀ ଛକ ଠାରୁ ସକାଳ ସାଢ଼େ ଦଶଟାରେ ବାଇକରେ ଯୁବକକୁ ଅପହରଣ କରିଥିଲେ ଅପହରଣକାରୀ । ଯୁବକର ମୁଣ୍ଡ ଜାମିନ ରଖି ପରିବାରକୁ ଦେଢ଼ ଲକ୍ଷ ଟଙ୍କା ଦାବି କରିବା ପରେ ପରିବାର ପକ୍ଷରୁ ନିମାପଡା ଥାନାରେ ଅଭିଯୋଗ ହୋଇଥିଲା ।
ଅଭିଯୋଗ ପାଇବା ପରେ ନିମାପଡ଼ା ପୋଲିସ ତ୍ବରିତ ପଦକ୍ଷେପ ନେଇ ଅପହୃତ ଯୁବକକୁ କୋଣାର୍କସ୍ଥିତ ଆମ୍ବୁଳି ଗାଁ ଏକ ବାତ୍ୟା ଆଶ୍ରୟସ୍ଥଳୀରୁ ଉଦ୍ଧାର କରିଥିଲା । ଅଭିଯୋଗ ଅନୁସାରେ ଅପହୃତ ଯୁବକ ମନୋଜ କୁମାର ମହାରଣା ଓ ଅପହରଣକାରୀ ଯୁବକ ଟ୍ରାନ୍ସପୋର୍ଟ ବ୍ୟବସାୟ କରୁଥିବାବେଳେ କିଛି ଟଙ୍କାକୁ ନେଇ ଏମାନଙ୍କ ମଧ୍ୟରେ ତିକ୍ତତା ସୃଷ୍ଟି ହୋଇଥିଲା ।
ଗତକାଲି ଅପହରଣକାରୀ ଯୁବକ ନିମାପଡ଼ା ଜୟଶ୍ରୀ ଛକରୁ ମନୋଜଙ୍କୁ ଅପହରଣ କରିଥିଲେ । ଅପହରଣକାରୀ ଯୁବକ ଦୁଇଜଣ ହେଲେ କଟକ ଜିଲ୍ଲା ନିଆଳି ଥାନା ରତନପୁର ଅଞ୍ଚଳର ରାଜକିଶୋର ବେହେରା ଓରଫ ରାଜୁ, ଲିପୁ ଓରଫ ଜଗନ୍ନାଥ ବେହେରା । ଉଭୟଙ୍କୁ ପୋଲିସ ଗିରଫ କରି ଅପହୃତ ଯୁବକଙ୍କୁ ଉଦ୍ଧାର କରିଛି । ଗିରଫ ଯୁବକଙ୍କ ଠାରୁ ଗୋଟିଏ ନମ୍ବରବିହୀନ ମୋଟର ସାଇକେଲ ଓ ଦୁଇଟି ମୋବାଇଲ ଜବତ କରିଛି ପୋଲିସ । ଗତକାଲି ନିମାପଡା ପୋଲିସ ଓ କୋଣାର୍କ ପୋଲିସ ମିଳିତ ଚଢ଼ାଉ କରି ଏହି ଯୁବକକୁ ଗିରଫ କରିବାରେ ସକ୍ଷମ ହୋଇଛି ।
ନିଆଳିରୁ ଉମେଶ ଚନ୍ଦ୍ର ମଲ୍ଲିକ, ଇଟିଭି ଭାରତ
