ପୁରୀ: ଶ୍ରୀମନ୍ଦିରରେ ମହାପ୍ରଭୁଙ୍କ ନୀତିକାନ୍ତି ବ୍ୟବସ୍ଥା ନେଇ କ୍ଷୋଭ ପ୍ରକାଶ କରିଛନ୍ତି ଜଗତଗୁରୁ ଶଙ୍କରାଚାର୍ଯ୍ୟ ସ୍ବାମୀ ନିଶ୍ଚଳାନନ୍ଦ ସରସ୍ବତୀ । ଶ୍ରୀମନ୍ଦିରରେ ପୁରାଣରେ ଥିବା ନୀତି ନିୟମ ବଦଳରେ ଅନ୍ଧ ପରମ୍ପରା ନେଇ ସେବା ପୂଜା ଚାଲିଥିବା ଶଙ୍କରାଚାର୍ଯ୍ୟ କହିଛନ୍ତି । ଏହା ଦ୍ବାରା ରାଜ୍ୟ ତଥା ଦେଶର କ୍ଷତି ଘଟିବ ବୋଲି ଜଗତଗୁରୁ ବାର୍ତ୍ତା ଦେଇଛନ୍ତି ।
ସ୍କନ୍ଦ ପୁରାଣରେ ବର୍ଣ୍ଣନା ରହିଛି ରଥଯାତ୍ରା ଦିନ ହିଁ ତିନି ରଥ ଗୁଣ୍ଡିଚା ମନ୍ଦିରରେ ଲାଗିଥାଏ ଓ ମହାପ୍ରଭୁଙ୍କୁ ରତ୍ନ ସିଂହାସନରେ ସ୍ଥାପନ କରାଯାଇଥାଏ । କିନ୍ତୁ ଏହି ନିୟମ ପରିବର୍ତ୍ତେ ସନ୍ଧ୍ୟା ହେଲେ ରଥ ଟଣା ବନ୍ଦ ରହୁଛି। ପୂର୍ବରୁ କିଛି ସେବାୟତ ଏହି ନିୟମ କରିଥିବାବେଳେ ଏହା ଆଜି ଯାଏ ଚାଲିଛି । ଏ ନେଇ ଶଙ୍କରାଚାର୍ଯ୍ୟଙ୍କ ପରାମର୍ଶ ନିଆଯାଉ ନାହିଁ ବୋଲି ସେ କହିଛନ୍ତି।
ସେହିପରି ଶ୍ରୀମନ୍ଦିରକୁ ଧର୍ମୀୟ ଆଧାରରେ ପରିଚଳନା ହେବା ପରିବର୍ତ୍ତେ ଧର୍ମ ନିରପେକ୍ଷ ଆଧାରରେ ପରିଚଳନା କରାଯାଉଛି ଯାହାକି ଦୁର୍ଭାଗ୍ୟଜନକ ବୋଲି ଜଗତଗୁରୁ କହିଛନ୍ତି । ଏହାସହ ରାଜନେତା ଓ ପ୍ରଶାସକ ଶ୍ରୀମନ୍ଦିର ଧର୍ମୀୟ ବ୍ୟବସ୍ଥାରେ ହସ୍ତକ୍ଷେପ କରି ପରିଚାଳନା କରୁଛନ୍ତି । ଏହିଭଳି ଭାବରେ ଶଙ୍କରାଚାର୍ଯ୍ୟଙ୍କ ଧର୍ମୀୟ ଅଧିକାରକୁ କ୍ଷୁର୍ଣ୍ଣ କରିବା ଷଡଯନ୍ତ୍ର କରାଯାଇଛି । ଯାହାକି ଅଗାମୀ ଦିନରେ ରାଜ୍ୟ ଓ ଦେଶ ପାଇଁ ବିପଦ ବୋଲି ସେ ଦର୍ଶାଇବା ସହ ରାଜ୍ୟବାସୀ ସଚେତନ ହୋଇ ଶଙ୍କରାଚାର୍ଯ୍ୟଙ୍କ ଅଧିକାର ନେଇ ଆଗେଇ ଆସିବାକୁ ସେ ପରାମର୍ଶ ଦେଇଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
