ପୁରୀ: ପୁରୀ ସହରରେ ପୁଣି ଗୁଳିକାଣ୍ଡ। କୁମ୍ଭାରପଡା ଥାନା ଦତ୍ତ ତୋଟା ଅଞ୍ଚଳରେ ସନ୍ଧ୍ୟାରେ ଏକ ଗୁଳିକାଣ୍ଡ ହୋଇଛି। ଏଥିରେ ଜଣେ ଯୁବକ ଆହତ ହୋଇଥିବା ବେଳେ ପୋଲିସ ତାଙ୍କୁ ଉଦ୍ଧାର କରି ପୁରୀ ମେଡ଼ିକାଲରେ ଚିକିତ୍ସା ପାଇଁ ଭର୍ତ୍ତି କରିଛି।
ତେବେ ଯୁବକଙ୍କ ସ୍ବାସ୍ଥ୍ୟ ଅବସ୍ଥା ଭଲ ରହିଛି। ଯୁବକ ଜଣକ ଅଳ୍ପକେ ମୃତ୍ୟୁ ମୁଖରୁ ବର୍ତ୍ତି ଯାଇଛନ୍ତି। ଆହତ ଯୁବକ ପୁରୀ ଗୋପବନ୍ଧୁ ଆୟୁର୍ବେଦ କଲେଜ ଛାତ୍ର ଜନ୍ମେଜୟ ମନ୍ତ୍ରୀ ବୋଲି ଜଣାପଡିଛି। ସୂଚନା ଅନୁଯାୟୀ ସନ୍ଧ୍ୟାରେ ଜନ୍ମେଜୟ କୌଣସି ଏକ କାମରେ ନିଜ ଘରୁ ବାହାରି ଯାଉଥିଲେ। ଏତିକି ବେଳେ ଦୁଇ ଜଣ ଯୁବକ ବାଇକ ଯୋଗେ ଆସି ତାଙ୍କୁ ଅଟକାଇ ମୋବାଇଲ ଫୋନ ଛଡାଇବା ସହ ଗଣ୍ଡଗୋଳ କରିଥିଲେ।
ଏହାର ପ୍ରତିରୋଧ କରିବାରୁ ଉକ୍ତ ଦୁଇ ଜଣ ଯୁବକ ପାଖରେ ରଖି ଥିବା ପିସ୍ତଲ କାଢି ଏକ ରାଉଣ୍ଡ ଗୁଳିକରି ଫେରାର ହୋଇ ଯାଇଥିଲେ। ଏହାକୁ ନେଇ ଏବେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଖେଳି ଯାଇଥିବା ବେଳେ ଗୁଳିକାଣ୍ଡର କାରଣ ଏବେ ବି ଅସ୍ପଷ୍ଟ । ଖବର ପୋଲିସ ଘଟଣାସ୍ଥଳରେ ପହଞ୍ଚି ଏହାର ତଦନ୍ତ ଆରମ୍ଭ କରିଛି।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
