ପୁରୀ: ଆଜି ପବିତ୍ର କାର୍ତ୍ତିକ ପୂର୍ଣ୍ଣିମା । ରାଜରାଜେଶ୍ବର ବେଶରେ ଦର୍ଶନ ଦେଉଛନ୍ତି କାଳିଆ ସାଆନ୍ତେ । ରାଜରାଜେଶ୍ବର ବେଶକୁ ସୁନାବେଶର ଅନୁରୂପ ବେଶ କୁହାଯାଏ । ଆଜି ଭଳି ପବିତ୍ର ଦିନରେ ମହାପ୍ରଭୁଙ୍କ ଟିକେ ଦର୍ଶନ ପାଇଁ କାହିଁ କେତେ ଦୂରରୁ ଧାଇଁ ଆସୁଛନ୍ତି ଭକ୍ତ ।
ହେଲେ ଭକ୍ତ-ଭଗବାନ ମଧ୍ୟରେ ପାଚେରୀ ହୋଇ ଛିଡା ହୋଇଥିବା କୋରୋନା ରୂପକ ମହାମାରୀ ଯୋଗୁଁ ଶ୍ରୀମନ୍ଦିର ଭକ୍ତଙ୍କ ଦର୍ଶନ ବନ୍ଦ ରହିଛି । ଫଳରେ ସିଂହଦ୍ବାରରୁ ମୁଣ୍ଡିଆ ମାରି ପତିତପାବନଙ୍କୁ ଦର୍ଶନ କରି ଫେରୁଯାଉଛନ୍ତି ଭକ୍ତ । ଗୋଟେ ପଟେ କୋରୋନା କଟକଣା ଅନ୍ୟପଟେ ଡଙ୍ଗା ଭସା ଉପରେ ପ୍ରଶାସନର ରୋକ ଭକ୍ତକୁ ନିରାଶ କରିଛି ।
ପ୍ରକାଶ ଥାଉକି, କୋରୋନା ମହାମାରୀ ଯୋଗୁଁ ଗତ 8 ମାସ ହେଲା ସର୍ବସାଧାରଣଙ୍କ ପାଇଁ ମନ୍ଦିର ବନ୍ଦ ରହିଛି । ହେଲେ କୋରୋନା କଟକଣା ମଧ୍ୟରେ କାଳିଆ ସାଆନ୍ତର ନେତକୁ ଟିକେ ଦେଖିବା ଭକ୍ତ ଧାଇଁ ଆସୁଛନ୍ତି । ମହାପ୍ରଭୁଙ୍କ ଦର୍ଶନ ନ ହେଲେ ବି ସେବାୟତଙ୍କ ଠାରୁ ତୁଳସୀ ଟିକେ ପାଇ ଫେରି ଯାଉଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
