ପୁରୀ: ଫନି ମାଡ ଭାଙ୍ଗିଦେଲା ପୁରୀ ପାନ ଚାଷୀଙ୍କ ହାଡ। ଏବେ ମାଟିରେ ମିଶିଯାଇଛି ପାନଚାଷୀଙ୍କ ଝାଳବୁହା ପରିଶ୍ରମ । ଲକ୍ଷ ଲକ୍ଷ ଟଙ୍କା ଖର୍ଚ୍ଚକରି ପାନବରଜ ଠିଆ କରିଥିବା ଚାଷି ପୁଣି ବରଜ ଠିଆ କରିବାକୁ ଚିନ୍ତାରେ ପଡିଯାଇଛି।
ଗୋଟିଏ ପଟେ ଅଭାବୀ ସଂସାର ଅନ୍ୟପଟେ ଅଦିନିଆ ଝଡ ବାତ୍ୟା । ଯାହା ପାନ ଗଛସବୁକୁ ପୋଛି ନେଇଛି। ବର୍ତ୍ତମାନ ଏହା ପାନ ଗଛ ଲଗାଇବାର ସିଜନ ହୋଇନଥିବା ବେଳେ ପବନ ମାଡରେ ତଳେ ପଡିଥିବା ପାନକୁ କିପରି ବଞ୍ଚାଇବ ସେ ନେଇ ପ୍ରାଣପଣେ ଉଦ୍ଯମ କରୁଛି ଚାଷୀ। ତେବେ ପାଖୁଡି ,ବତା ବାନ୍ଧି ପୁଣି ଥରେ ବରଜ ଠିଆ କରିବା ଚାଷୀ ପାଇଁ ହୋଇଛି ବଡ ମୁସ୍କିଲ।
ଏହା ମଧ୍ୟରେ ଅନେକ ସ୍ଥାନରେ ଗଛ ବଞ୍ଚାଇବାର ଆଶାରେ ପାନ ଗଛକୁ ଠିଆ କରିବାକୁ ଚେଷ୍ଟା କରୁଛନ୍ତି ଅନେକ ଚାଷୀ। ହେଲେ ଏସବୁରେ ବାଧକ ସାଜୁଛି ପାଣିର ଅଭାବ ଓ ବିଦ୍ଯୁତ ବିଛିନ୍ନ । ପମ୍ପ ଯୋଗେ ପାଣି ଉଠାଇ ନଦେଲେ ଗଛ ମରିଯିବାର ଭୟ। ବଜାରରେ ଡିଜେଲ ମିଳୁନଥିବା ବେଳେ ରେଜାରେ ଚଢା ଦରରେ ବିକ୍ରି ଚାଷୀ ପାଇଁ ଚିନ୍ତାର କାରଣ ସୃଷ୍ଟି କରିଛି।
ପୁରୀ ଜିଲ୍ଲା ରଟିଲୋ, ପିପିଲି, ଡେଲାଙ୍ଗ, କାକଟପୁର, ନିମାପଡା, ଗୋପ ବ୍ଲକର ଅନେକ ପାନ ଚାଷିଙ୍କ ଏପରି ଅବସ୍ଥା। ବର୍ତ୍ତମାନ ସୁଦ୍ଧା ପ୍ରଶାସନିକ ଅଧିକାରୀଙ୍କ ଦେଖା ମିଳିନଥିବା ବେଳେ ସହାୟତା ରାଶି ମିଳିବକି ନାହିଁ ସେ ନେଇ ଚିନ୍ତାରେ ପଡିଛନ୍ତି ପାନଚାଷୀ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
