ପୁରୀ: ଆସନ୍ତା 14 ଠାରୁ ଆରମ୍ଭ ହେବାକୁ ଯାଉଛି କାର୍ତ୍ତିକ ମାସ । ଏନେଇ ଆଜି ଅନୁଷ୍ଠିତ ହୋଇଯାଇଛି ଛତିଶା ନିଯୋଗ ବୈଠକ । ମୁଖ୍ୟତଃ ଧର୍ମ ମାସ କାର୍ତ୍ତିକରେ ଶ୍ରୀମନ୍ଦରିରେ ଶୃଙ୍ଖଳିତ ନୀତିକାନ୍ତି ହୋଇପାରିବ ସେନେଇ ଆଲୋଚନା ହୋଇଛି । ଏହି ବୈଠକରେ ପୁରୀ ଜିଲ୍ଲାପାଳ ବଲବନ୍ତ ସିଂ, ପୁରୀ ଏସପି ଉମାଶଙ୍କର ଦାସଙ୍କ ସମେତ ଛତିଶା ନିଯୋଗର କର୍ମକର୍ତ୍ତା ଯୋଗ ଦେଇଥିଲେ ।
ଆସନ୍ତା 9 ତାରିଖରୁ କାର୍ତ୍ତିକ ନିତି ଶ୍ରୀମନ୍ଦିରରେ ଆରମ୍ଭ ହେବ । ଏହା ଆସନ୍ତା ମାସ 12 ତାରିଖରେ ଶେଷ ହେବ । ଏଣୁ କାର୍ତ୍ତିକ ମାସରେ ଶ୍ରୀମନ୍ଦିରରେ ଶୃଙ୍ଖଳିତ ନୀତି,ପଞ୍ଚୁକରେ ଠାକୁରଙ୍କ ବେଶ କିଭଳି ହୋଇ ପାରିବ ସେନେଇ ନିଷ୍ପତି ହୋଇଛି ।
ସେହିପରି ଆସନ୍ତା 14 ତାରିଖରୁ କାର୍ତ୍ତିକ ବ୍ରତ ଆରମ୍ଭ ହେଉଛି । ଏଥର ତିନିଟି ଜାଗାରେ ଯଥା ରେଲୱେ ଯାତ୍ରୀ ନିବାସ, ହବିଷ୍ୟାଳି ନୂଆ ବିଲ୍ଡିଂ ଓ ମୋଚି ସାହି କଲ୍ୟାଣ ମଣ୍ଡପରେ ହବିଷ୍ୟାଳି ରହିବେ । ସେଠାରେ କିଭଳି ହବିଷ୍ୟାଳି ମାନେ ସଠିକ ସମୟରେ ମହାପ୍ରସାଦ ପାଇ ପାରିବେ ସେନେଇ ସୁଆର ମହାସୁଆର ନିଯୋଗ ସହିତ ଆଲୋଚନା ହୋଇଛି ।
ସେହିପରି ହବିଷ୍ୟାଳି ଶିବିରରେ ଭଜନ କୀର୍ତ୍ତନ ସମେତ କାର୍ତ୍ତିକ ବ୍ରତ ପାଇଁ ଆବଶ୍ୟକ ବ୍ୟବସ୍ଥା ମଧ୍ୟ ପ୍ରଶାସନ ଯୋଗାଇ ଦେବ । 25 ଶହ ହବିଷ୍ୟାଳି ଏଥର ଶିବିରରେ ରହିବା ନେଇ ବ୍ୟବସ୍ଥା ହୋଇଛି । ସେହିପରି ରଥଯାତ୍ରା ସହିତ ଶ୍ରୀମନ୍ଦିରରେ ବିଭିନ୍ନ ନୀତିକାନ୍ତି ପାଇଁ ସେବାୟତ ମାନେ ପାଇବାକୁ ଥିବା ପାଳିଆ ପୁରସ୍କାର ଓ ପ୍ରାପ୍ୟ ପାଉଣା ବିଷୟରେ ଆଲୋଚନା ହୋଇଥିଲା ।
ଆସନ୍ତା 10 ତାରିଖରେ ସମସ୍ତ ପ୍ରାପ୍ୟ ପାଉଣା ସେବକମାନଙ୍କୁ ଦିଆଯିବ ବୋଲି ନିଷ୍ପତି ହୋଇଛି । ସେହିପରି ଏଣିକି ସବୁ ବୁଧବାର ଦିନ ଶ୍ରୀମନ୍ଦିର ମୁଖ୍ୟ ପ୍ରଶାସକ ସେବାୟତଙ୍କ ବିଭିନ୍ନ ସମସ୍ୟା ଓ ଏହାର ସମାଧାନ ନେଇ ଶୁଣାଣି କରିବେ । ଏହା ଦ୍ବାରା ସେବାୟତ ମାନେ ଉପକୃତ ହୋଇ ପାରିବେ । ତେବେ କାର୍ତ୍ତିକ ମାସ ନୀତିକାନ୍ତି ସୂଚାରୁ ରୁପେ କରିବା ନେଇ ଛତିଶା ନିଯୋଗ ପ୍ରଶାସନକୁ ପ୍ରତିଶ୍ରୁତି ଦେଇଛି ।
ପୁରୀରୁ ଶକ୍ତିପ୍ରସାଦ ମିଶ୍ର, ଇଟିଭି ଭାରତ
