ପୁରୀ: ନିଶା କାରବାର କରି ବନ୍ଧା ହେଲେ ବେପାରୀ । ପୁରୀ ସମୁଦ୍ରକୂଳ ଥାନା ପୋଲିସ ଦୁଇଟି ପୃଥକ ପୃଥକ ସ୍ଥାନରେ ଚଢାଉ କରି ପାଞ୍ଚଜଣଙ୍କୁ ଗିରଫ କରିଛି । ସେମାନଙ୍କଠାରୁ ବିଭିନ୍ନ ନିଶା ସାମଗ୍ରୀ ଜବତ କରିଛି ପୁରୀ ପୋଲିସ ।
ୱାଟର ୱାର୍କ୍ସ ରୋଡରେ ଚଢଉ କରି ପେଣ୍ଠକଟାର କପିଳ ପୃଷ୍ଟି ଓ ମୁନ୍ନା ଓରଫ ମହେନ୍ଦ୍ର ସାହୁକୁ କାବୁ କରିଛି ପୋଲିସ । ସେମାନଙ୍କଠାରୁ 27ଟି କୋରେକ୍ସ ବୋତଲ ଜବତ କରିଛି । ଏହା ସହିତ ଜେଲରୋଡ ବାଙ୍କୀମୁହାଣ ଅଞ୍ଚଳର ମହାବୀର ବାରୁକଠାରୁ 24 ବୋତଲ କୋରେକ୍ସ ବୋତଲ ଜବତ ହୋଇଛି । ଉଭୟଙ୍କୁ କୋର୍ଟ ଚାଲାଣ କରାଯାଇଥିବା ସୂଚନା ମିଳିଛି ।
ଅନ୍ୟପଟେ ପୁରୀ ବଡ଼ଦାଣ୍ଡର ବଗଲା ଧର୍ମଶାଳା ନିକଟରେ ଲୋକଙ୍କୁ ଏସକଫ କଫସିରଫ ବିକ୍ରି କରୁଥିବା ଅଭିଯୋଗରେ କୁମ୍ଭାରପଡା ପୋଲିସ ଦୁଇଜଣଙ୍କୁ ଗିରଫ କରିଛି । ସେମାନଙ୍କଠାରୁ ୩୦ଟି ଏସକଫ କଫସିରଫ ,୧୯୦୦ଟଙ୍କା, ଗୋଟିଏ ବୁଲେଟ ମୋଟରସାଇକେଲ, ଦୁଇଟି ମୋବାଇଲ ଜବତ ହୋଇଛି । ଗିରଫ ଅଭିଯୁକ୍ତ ହେଲେ ହାଡ଼ଗୋଡ଼ିଆ ସାହିର ଜ୍ଞାନରଞ୍ଜନ ବେହେରା ଓ ମଣିକର୍ଣ୍ଣିକା ସାହିର ଜଗନ୍ନାଥ ପ୍ରତିହାରୀ ।
ପୁରୀରୁ ଶକ୍ତି ପ୍ରସାଦ ମିଶ୍ର,ଇଟିଭି ଭାରତ
