କଟକ: ଗତକାଲି କଟକ ରେଭେନ୍ସା ବିଶ୍ବବିଦ୍ୟାଳୟ ସମ୍ମୁଖରେ ଏକ ଟ୍ରକ ଧକ୍କାରେ ଜଣେ କଲେଜ ଛାତ୍ରୀଙ୍କ ମୃତ୍ୟୁ ଘଟିଥିଲା । ତେବେ ଘଟଣା ପରଠାରୁ ଉତ୍ତେଜନା ଥମିବାର ନା ଧରୁନିଁ । ଗତକାଲି ଠାରୁ ସହପାଠୀ ଓ ସାଧାରଣ ଲୋକ ଆନ୍ଦୋଳନ କରୁଛନ୍ତି । କଲେଜ ସାମ୍ନାରେ ଥିବା ମୁଖ୍ୟ ରାସ୍ଥାକୁ ଅବରୋଧ କରି ଆନ୍ଦୋଳନ ଜାରି ରଖିଛନ୍ତି ରେଭେନ୍ସାର ଶତାଧିକ ଛାତ୍ରଛାତ୍ରୀ ।
ମୃତ ଛାତ୍ରୀଙ୍କ ପରିବାରକୁ 50 ଲକ୍ଷ ଟଙ୍କା କ୍ଷତି ପୂରଣ, ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ସହ ମୁଖ୍ୟରାସ୍ତାରେ ହମ୍ପ୍ସ ଓ ସ୍ପୀଡ ବ୍ରେକର ଲଗାଇବା ଦାବିରେ ଛାତ୍ରଛାତ୍ରୀ ଆନ୍ଦୋଳନରେ ବସିଛନ୍ତି । ଏହାସହ କେଉଁ ପରିସ୍ଥିତିରେ ରେଭେନ୍ସା ସମ୍ମୁଖକୁ ଟ୍ରକ ଆସିଲା ତାର ମଧ୍ୟ ତଦନ୍ତ କରିବା ପାଇଁ ଛାତ୍ରଛାତ୍ରୀ ଅଡି ବସିଛନ୍ତି ।
ଅନ୍ୟପଟେ କଟକ ଡିସିପିଙ୍କ ନିର୍ଦେଶରେ ଟ୍ରାଫିକ ଏସିପି ଘଟଣାର ତଦନ୍ତ କରି ରିପୋର୍ଟ ଦେଇଛନ୍ତି । ରିପୋର୍ଟ ପାଇଲା ପରେ ଡିସିପି ଅଖିଳେଶ୍ବର ସିଂ 2ଜଣ ପୋଲିସ ଅଧିକାରୀଙ୍କୁ ନିଳମ୍ବିତ କରିଛନ୍ତି । ଜଣେ କନେଷ୍ଟବଳ ଓ ଆଉ ଜଣେ ହାବିଲଦାର ଏହି ଘଟଣାରେ ନିଳମ୍ବିତ ହୋଇଛନ୍ତି । ଏହି ଦୁଇ ନିଳମ୍ବିତ ଅଧିକାରୀ ଟ୍ରକକୁ ବେଆଇନ ପାର୍କିଂ କରାଇଥିଲେ ବୋଲି ଜଣାପଡିଛି।
କଟକରୁ ନାରାୟଣ ସାହୁ, ଇଟିଭି ଭାରତ
