କଟକ: ରାତି ପାହିଲେ ବିଶ୍ବ ପ୍ରସିଦ୍ଧ ଘୋଷଯାତ୍ରା । ହଜାର ହଜାର ଭକ୍ତ ବସ ଯୋଗେ କଟକ ବାଦାମବାଡ଼ିରେ ଥିବା ପୁରୀ ବସଷ୍ଟାଣ୍ଡ ଦେଇ ପୁରୀ ଅଭିମୁଖେ ଯାତ୍ରା କରିବେ । ଏଥିପାଇଁ ସ୍ବତନ୍ତ୍ର 200 ବସର ବ୍ୟବସ୍ଥା ମଧ୍ୟ କରାଯାଇଛି । କିନ୍ତୁ ବିପର୍ଯ୍ୟସ୍ତ ଅବସ୍ଥାରେ ପଡିରହିଛି ପୁରୀ ବସଷ୍ଟାଣ୍ଡ । ଏହା ଭିତରେ ଲହଡି ଭାଙ୍ଗୁଛି ନାଳପାଣି । ଆଉ ବସ ଷ୍ଟାଣ୍ଟ ଭିତରେ ଖାଲ ଖମାରେ ଭରି ରହିଥିବାରୁ ପାଦେ ଚାଲିବା ମଧ୍ୟ କଷ୍ଟକର ହୋଇପଡୁଛି । ଆଉ ଏହା ସାଙ୍ଗକୁ ଅସହ୍ୟ ଦୁର୍ଗନ୍ଧରେ ଫାଟି ପଡୁଛି ସମଗ୍ର ଅଞ୍ଚଳ ।
ଖାଲି ସେତିକି ନୁହେଁ ଏତେବଡ ବସଷ୍ଟାଣ୍ଟ ହୋଇଥିବା ସତ୍ତ୍ବେ କେଉଁଠି ଗୋଟେ ହେଲେ ମଧ୍ୟ ଡଷ୍ଟବିନର ବ୍ୟବସ୍ଥା କରାଯାଇନାହିଁ । ଏହା ସାଙ୍ଗକୁ ଶୌଚାଳୟ କଥାତ ନକହିବା ଭଲ । ତେବେ ବସଷ୍ଟାଣ୍ଡର ଏଭଳି ଶୋଚନୀୟ ଅବସ୍ଥା ଦେଖି ପରିବହନ ବିଭାଗର ପାରିବା ପଣିଆ ଉପରେ ସାଧାରଣରେ ପ୍ରଶ୍ନବାଚୀ ଉଠିଛି ।
ଅନ୍ୟପଟେ ପ୍ରତି ବସରୁ ପାର୍କିଂ ଫି ବାବଦକୁ ପ୍ରତ୍ୟକ ଦିନ ୧୫ ଟଙ୍କା ଓ ପ୍ରତି ଟ୍ରଲି ପିଛା ୨୦ ଟଙ୍କା ରାଜସ୍ବ ଆଦାୟ କରିଥାଏ ପରିବହନ ବିଭାଗ । ଏଭଳି ବର୍ଷକୁ ଲକ୍ଷ ଲକ୍ଷ ଟଙ୍କା ରାଜସ୍ବ ଆଦାୟ ହୋଇଥାଏ ଏହି ବସଷ୍ଟାଣ୍ଡରୁ । ସବୁଠାରୁ ଆଶ୍ଚର୍ଯ୍ୟ କଥା ହେଉଛି ଯାତ୍ରୀ ମାନଙ୍କୁ ମୌଳିକ ସୁବିଧା ଯୋଗାଇବାରେ ବିଫଳ ରାଜ୍ୟ ପରିବହନ ବିଭାଗ । ଅନ୍ୟପଟେ ରଥଯାତ୍ରା ପୂର୍ବରୁ ବସଷ୍ଟାଣ୍ଡର ଏଭଳି ଅବ୍ୟବସ୍ଥାକୁ ବାରମ୍ବାର ଆଲୋଚନା କରାଯାଇଥିଲେ ମଧ୍ୟ କୌଣସି ଲାଭ ମିଳୁନାହିଁ । ଯାହାକୁ ନେଇ କ୍ଷୋଭ ପ୍ରକାଶ କରିଛି ରାଜ୍ୟ ଘରୋଇ ବସ ମାଲିକ ସଙ୍ଘ ।
କଟକରୁ ନାରାୟଣ ସାହୁ, ଇଟିଭି ଭାରତ
