କଟକ: ହାତପାହାନ୍ତାରେ ମିଳିବ ଓଡ଼ିଶା ହାଇକୋର୍ଟଙ୍କ ସମ୍ପର୍କିତ ସମସ୍ତ ତଥ୍ୟ ଓ ସୂଚନା । ଆଇନଜୀବୀ ଅବା ପ୍ରତିପକ୍ଷ ସମସ୍ତଙ୍କୁ ମିଳିବ କୋର୍ଟଙ୍କ ସମସ୍ତ ସୂଚନା । ସୋସିଆଲ ମିଡ଼ିଆ ଆପ ଟେଲିଗ୍ରାମରେ ମିଳିବ ଓଡ଼ିଶା ହାଇକୋର୍ଟଙ୍କ ତଥ୍ୟ ।
ଆସନ୍ତା 19 ତାରିଖରୁ ଟେଲିଗ୍ରାମ୍ ଚ୍ୟାନେଲରେ ସମସ୍ତ ତଥ୍ୟ ସେୟାର୍ କରାଯିବ । ଟେଲିଗ୍ରାମରେ ଆରମ୍ଭ ହୋଇଛି ହାଇକୋର୍ଟଙ୍କ ଅଫିସିଆଲ୍ ଚ୍ୟାନେଲ । ଏଥିରେ କୋର୍ଟର କାର୍ଯ୍ୟସୂଚୀ ସହ ସର୍କୁଲାର, ନୋଟିସ୍, ପ୍ରେସ୍ ଇସ୍ତାହାର ସବୁକିଛି ମିଳିବ । ଇଚ୍ଛୁକ ବ୍ୟକ୍ତି ଟେଲିଗ୍ରାମରେ ଓଡ଼ିଶା ହାଇକୋର୍ଟ ସହ ଯୋଡ଼ି ହୋଇ ଏହାର ଲାଭ ଉଠାଇ ପାରିବେ ।
ଚ୍ୟାନେଲକୁ ସବସ୍କ୍ରାଇବ୍ କଲା ପରେ ମୋବାଇଲକୁ ଆସିବ ପ୍ରତିଟି ଅପଡେଟ୍ । ପୂର୍ବରୁ କୌଣସି ସୂଚନା ପାଇଁ ହାଇକୋର୍ଟର ୱେବସାଇଟକୁ ଯିବାକୁ ପଡ଼ୁଥିବା ବେଳେ ଏବେ ଟେଲିଗ୍ରାମରେ ଗୋଟିଏ କ୍ଲିକରେ ସବୁକିଛି ମିଳି ପାରିବ । ସୂଚନା ଓ ଯୋଗାଯୋଗ ଜ୍ଞାନ କୌଶଳ ପ୍ରୟୋଗରେ ଆଇନଜୀବୀ ଓ ଆଇନ୍ ସହାୟତା ଅପେକ୍ଷାରେ ଥିବା ଲୋକମାନଙ୍କ ପାଇଁ ନ୍ୟାୟାଳୟ ସଂପର୍କିତ ସୂଚନା ଆହରଣ ସହଜ ଓ ସୁବିଧାଜନକ ହେବ । ତତ୍କ୍ଷଣାତ୍ ସୂଚନା ଆଦାନପ୍ରଦାନ ନିମନ୍ତେ ଏକ ଅତିରିକ୍ତ ବ୍ୟବସ୍ଥା ସ୍ବରୂପ ଓଡି଼ଶା ହାଇକୋର୍ଟଙ୍କ ପକ୍ଷରୁ ଏକ କାର୍ଯ୍ୟାଳୟ ଟେଲିଗ୍ରାମ୍ ଚାନେଲ ପ୍ରସ୍ତୁତ କରାଯାଇଛି । ଉକ୍ତ ଚାନେଲର ଉପଯୋଗ କରି ଆଇନଜୀବୀ ଓ ବ୍ୟକ୍ତିବିଶେଷମାନେ ଏହି ସୁବିଧା ଲାଭ କରିପାରିବେ ।
ଓଡି଼ଶା ଉଚ୍ଚ ନ୍ୟାୟାଳୟ କାର୍ଯ୍ୟାଳୟ ଟେଲିଗ୍ରାମ୍ ଚାନେଲ ଉପଯୋଗ କରିବା ପାଇଁ ଗୁଗୁଲ ପ୍ଲେ ଷ୍ଟୋରରୁ ଏହି ଆପ୍ ଡାଉନ୍ଲୋଡ୍ ଓ ଇନ୍ଷ୍ଟାଲ କରିବାକୁ ପଡିବ । ନ୍ୟାୟାଳୟଙ୍କ ଟେଲିଗ୍ରାମ୍ ଚ୍ୟାନେଲ ହେଲା- htpps://t.me/OrissaHighCourt । ଆସନ୍ତା ସୋମବାରଠାରୁ ଉଚ୍ଚ ନ୍ୟାୟାଳୟ କାର୍ଯ୍ୟାଳୟ ଟେଲିଗ୍ରାମ୍ ଚାନେଲ ମାଧ୍ୟମରେ ସୂଚନା ଆଦାନପ୍ରଦାନ ଆରମ୍ଭ କରିବାକୁ ନିଷ୍ପତ୍ତି ନିଆଯାଇଛି ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
