କଟକ: ଟ୍ରାଫିକ୍ ନୂଆ ନିୟମ ପାଇଁ କିଛି ଦିନ ଧରପଗଡ ପରେ ଲୋକଙ୍କୁ ସଚେତନ କରୁଛି ଟ୍ରାଫିକ୍ ପୋଲିସ । ଗତକାଲି(ସୋମବାର) ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ପରେ ଆଜି କଟକରେ ଲୋକଙ୍କୁ ନୂଆ ନିୟମ ବାବଦରେ ବୁଝାଉଛି ଟ୍ରାଫିକ୍ ପୋଲିସ । ଏନେଇ ଆଜି ଖୋଦ୍ ଟ୍ରାଫିକ୍ ଡିସିପି ସାଗରିକା ନାଥ ରାସ୍ତାକୁ ଓହ୍ଲାଇବା ସହ ଯେଉଁମାନେ ନିୟମ ମାନୁଛନ୍ତି ତାଙ୍କୁ ଗୋଲାପ ଫୁଲ ଓ ଚକଲେଟ ଦେଉଛନ୍ତି।
ମୁଖ୍ୟମନ୍ତ୍ରୀ 3 ମାସ ପର୍ଯ୍ୟନ୍ତ ଏହି ନିୟମକୁ କୋହଳ କରି ଲୋକଙ୍କୁ ସଚେତନତା କରିବା ପାଇଁ ଗତକାଲି କହିଥିଲେ । ଏହାସହ ଲୋକଙ୍କୁ ତିନି ମାସ ଭିତରେ ସବୁ କାଗଜ ପତ୍ର ପ୍ରସ୍ତୁତ କରିବା ପାଇଁ ମଧ୍ୟ ସେ କହିଥିଲେ । ଏହାପରେ ଆଜି କଟକରେ ଏଭଳି ଦୃଶ୍ୟ ଦେଖିବାକୁ ମିଳିଛି।
ତେବେ କଟକରେ ଟ୍ରାଫିକ୍ ପୋଲିସ ସଚେତନତା କରୁଥିବା ସମୟରେ ଅଧିକାଂଶ ଲୋକ ନିୟମ ମାନୁଥିବା ଦେଖିବାକୁ ମିଳିଛି । ସେହିପରି ସିନେ ଅଭିନେତା ଶ୍ରୀତମ ଦାସ ମଧ୍ୟ ଲୋକଙ୍କୁ ନିୟମ ବିଷୟରେ ବୁଝାଇବା ସହ ଗୋଲାପ ଫୁଲ ଦେଉଛନ୍ତି । ଏଥିସହ ଦୁର୍ଘଟଣାରୁ ବର୍ତ୍ତିବା ପାଇଁ ଲୋକେ ଟ୍ରାଫିକ୍ ନିୟମ ମାନିବାକୁ ସେ ଲୋକଙ୍କୁ ଅନୁରୋଧ କରିଛନ୍ତି।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
