ନିଆଳି: ରାଜଧାନୀ ଉପକଣ୍ଠ ବାଲିପାଟଣାରେ ବିଭିନ୍ନ ବନ୍ୟାଞ୍ଚଳ ପରିଦର୍ଶନ କରିଛନ୍ତି ଭୁବନେଶ୍ବର ସାଂସଦ ଅପରାଜିତା ଷଡ଼ଙ୍ଗୀ । ସେହିପରି ବିଜେଡ଼ି ରାଜ୍ୟସଭା ସାଂସଦ ମୁନ୍ନା ଖାଁ ମଧ୍ୟ ବନ୍ୟାଞ୍ଚଳ ପରିଦର୍ଶନ କରିଛନ୍ତି । ଏହାସହ ଉଭୟ ବନ୍ୟା ବିପନ୍ନଙ୍କୁ ରିଲିଫ ବାଣ୍ଟିଛନ୍ତି । ନଦୀରେ ଜଳସ୍ତର ହ୍ରାସ ହେବା ପରେ ମଧ୍ୟ କମିନି ବନ୍ୟା ପୀଡ଼ିତଙ୍କ ଦୁଃଖ । ଏବେ ବି ଲୋକେ ବନ୍ୟାପାଣି ଘେରରେ ରହିଛନ୍ତି । ବିଭିନ୍ନ ରାଜନେତା ଓ ସାମାଜିକ ସଂଗଠନର ସଦସ୍ୟ ବନ୍ୟାଞ୍ଚଳ ପରିଦର୍ଶନ କରି ସହାୟତା ପାଇଁ ଆଗେଇ ଆସିଛନ୍ତି ।
ରାଜଧାନୀ ଉପକଣ୍ଠ ତଥା ଖୋର୍ଦ୍ଧା ଜିଲ୍ଲା ବାଲିପାଟଣା ଇନ୍ଦୋଳ କୁଶିଆରୀ, ବିଲସାହି ଗାଁକୁ ଯାଇ ଲୋକଙ୍କ ଦୁର୍ଦ୍ଦଶା ଦେଖିଛନ୍ତି । ଧାନ ଚାଷରେ ହୋଇଥିବା କ୍ଷତି ପାଇଁ ଇନ୍ସୁରାନ୍ସର ବ୍ୟବସ୍ଥା, ଅଚ୍ୟୁତପୁରକାଜ ଠାରେ ସୁଇସ୍ ଗେଟ୍ ପାଇଁ ବ୍ୟବସ୍ଥା କରିବା ସହ ଧନୁଆ ନଦୀର ଆଡ଼ି ବନ୍ଧ ପାଇଁ କେନ୍ଦ୍ର ସରକାରଙ୍କ ପାଖରେ ସେ ପ୍ରସ୍ତାବ ରଖିବେ ବୋଲି ଅପରାଜିତା ଲୋକମାନଙ୍କୁ କହିଛନ୍ତି ।
ଅନ୍ୟପଟେ ରାଜ୍ୟସଭା ସାଂସଦ ମୁନ୍ନା ଖାଁ ବାଲିପାଟଣାର ବେଲମରା ଗାଁକୁ ଯାଇ ଲୋକଙ୍କ ସହ ଆଲୋଚନା କରିଛନ୍ତି । ରାଜ୍ୟ ସରକାରଙ୍କ ପକ୍ଷରୁ ବନ୍ୟା ପ୍ରଭାବିତ ସମସ୍ତ ପରିବାରକୁ ସାହାଯ୍ୟ କରାଯିବ ବୋଲି ସାଂସଦ ପ୍ରତିଶୃତି ଦେଇଛନ୍ତି ।
ଇଟିଭି ଭାରତ, ନିଆଳି
