କଟକ: ରେଳ ଷ୍ଟେସନରୁ ସେନା ବାହିନୀର ଜଣେ ଯବାନ ନିଖୋଜ (Jawan missing) ହୋଇଯାଇଛନ୍ତି । ଏନେଇ ସେନା ପକ୍ଷରୁ କଟକ ରେଳବାଇ ପୋଲିସ ଷ୍ଟେସନରେ ଏତଲା ମଧ୍ୟ ଦିଆଯାଇଛି । ସମ୍ପୃକ୍ତ ଯବାନଙ୍କ ନାଁ ଟେନଜିନ୍ ଗଓ୍ବା ଓ ସେ କର୍ଣ୍ଣାଟକ ବାସିନ୍ଦା ହୋଇଥିବା ସୂଚନା ମିଳିଛି ।
କଟକରେ ଆୟୋଜିତ ହେଉଥିବା ଏକ କ୍ୟାମ୍ପରେ ଯୋଗ ଦେବାକୁ ୧୫୦ ଜଣ ଯବାନ ଦିଲ୍ଲୀରୁ ରାଜଧାନୀ ଏକ୍ସପ୍ରେସ ଯୋଗେ କଟକ ଆସିଥିଲେ । ଟ୍ରେନଟି ଗତକାଲି(ମଙ୍ଗଳବାର) ଅପରାହ୍ନ ପ୍ରାୟ ସାଢେ ୩ଟା ବେଳେ କଟକରେ ପହଁଚିବା ପରେ ସମସ୍ତ ଯବାନ ଓହ୍ଲାଇଥିଲେ । କିନ୍ତୁ ସେମାନଙ୍କ ଗଣତି ସମୟରେ ଟେନଜିନ୍ ଗଓ୍ବା ସେହି ଗ୍ରୁପରେ ନ ଥିବା ଜଣାପଡ଼ିଥିଲା । ତାଙ୍କ ମୋବାଇଲ ନମ୍ବରରେ ଯୋଗେଯୋଗ ସମ୍ଭବପର ନ ହେବାରୁ ଏନେଇ ରେଳବାଇ ଥାନାରେ ସେନାର ମେଜର ଏକ ମାମଲା ରୁଜୁ କରିଛନ୍ତି ।
ସେପଟେ ନିଖୋଜ ଯବାନଙ୍କ CDR ଯାଞ୍ଚ କରିବ ରେଳବାଇ ପୋଲିସ । ଷ୍ଟେସନର ସମସ୍ତ ସିସିଟିଭି ଯାଞ୍ଚ ଆରମ୍ଭ ହୋଇଛି । ଦିଲ୍ଲୀ ପର୍ଯ୍ୟନ୍ତ ସମସ୍ତ ରେଳ ଷ୍ଟେସନକୁ ଅବଗତ କରିଛି କଟକ GFP । ଯବାନ ନିଜ ରାଇଫଲ ନେଇ ନଥିବା ଜଣାପଡିଛି ।
କଟକରୁ ନାରାୟଣ ସାହୁ, ପ୍ରଭୁକଲ୍ୟାଣ ପାଲ, ଇଟିଭି ଭାରତ
