କଟକ: ଜିଲ୍ଲା ଅବକାରୀ ବିଭାଗ ପକ୍ଷରୁ କଟକ ସହରର ବିଭିନ୍ନ ସ୍ଥାନରେ ଚଢାଉ କରାଯାଇଛି । ଯେଉଁଥିରେ ଚୌଦ୍ବାର ସମେତ କଟକ ସଦର, ଆଠଗଡ, ଜଗତପୁର, ବାଙ୍କି ଓ ମାହାଙ୍ଗାରେ ଚଢାଉ କରାଯାଇଥିଲା। ବେଆଇନ ମଦ କାରବାର ଅଭିଯୋଗରେ ଅବକାରୀ ବିଭାଗ ପକ୍ଷରୁ ହୋଇଥିବା ଚଢାଉରେ ଜଣେ ମହିଳାଙ୍କ ସମେତ 9 ଜଣ ମଦ ବ୍ୟବସାୟୀଙ୍କୁ ଅବକାରୀ ବିଭାଗ ଗିରଫ କରିଛି ।
ଗିରଫ ଅଭିଯୁକ୍ତଙ୍କ ଠାରୁ 3 କ୍ବିଣ୍ଟାଲରୁ ଅଧିକ ପରିମାଣର ବିଭିନ୍ନ କିସମର ବିଦେଶୀ ମଦ ଓ 230 ଲିଟର ଦେଶୀ ମଦ ଜବତ ହୋଇଛି । ଏଥିସହ ସମ୍ପୃକ୍ତଙ୍କ ପାଖରୁ 3ଟି ବାଇକ ଜବତ ହୋଇଛି । ତେବେ ଗିରଫ ଅଭିଯୁକ୍ତମାନେ ହେଲେ ଆଠଗଡର ତୁଷାର ମଲ୍ଲିକ, କାରିକୋଲାର ଅଶୋକ ମଲ୍ଲିକ, ତେଲେଙ୍ଗା ପେଣ୍ଠ ନୂଆଗଡର ଅଜିତ ସିଂହ, ଚୌଦ୍ବାର ଅଞ୍ଚଳର ଅନିଲ ଭୂୟାଁ, ଶଙ୍କରପୁରର ମହେନ୍ଦ୍ର ଭୂୟାଁ, ଦୁର୍ଯ୍ୟୋଧନ ପ୍ରଧାନ, ବାଙ୍କି ଅଞ୍ଚଳର ସଞ୍ଜୟ ମଲ୍ଲିକ, ପ୍ରତାପ ମଲ୍ଲିକ ଓ ନିଶ୍ଚିନ୍ତକୋଇଲିର ଜାନକୀ ବେହେରା।
ତେବେ କୋରନା ପାଇଁ ଲକଡାଉନ ସମୟରେ ଚୋରା ମଦ ବ୍ୟବସାୟୀମାନେ ସକ୍ରିୟ ହୋଇଥିବା ଜଣା ପଡିଛି । ଏଥିସହ ଜଙ୍ଗଲ ମଧ୍ୟରେ ପ୍ରସ୍ତୁତ କରୁଥିବା ରନ୍ଧା ମଦ ଓ ଗଚ୍ଛିତ ବିଦେଶୀ ମଦକୁ ତିନି ଗୁଣା ଦରରେ ବିକ୍ରି କରୁଥିବା ଚର୍ଚ୍ଚା ଜୋର ଧରିଛି ।
କଟକରୁ ନାରାୟଣ ସାହୁ, ଇଟିଭି ଭାରତ
