କଟକ: କଲେଜ ଛକରେ ପଡିଲା ରକ୍ତର ଛିଟା । ପରକୀୟା ପ୍ରୀତି ସନ୍ଧେହରେ ଗଡିଲା ମୁଣ୍ଡ । ସ୍ତ୍ରୀର ପରକୀୟା ପ୍ରୀତିଥିବା ସନ୍ଦେହ କରି ରକ୍ତର ହୋଲି ଖେଳିଲା ସ୍ବାମୀ । ଶେଷରେ ଧାରୁଆ ଅସ୍ତ୍ରରେ ନେଲା ସ୍ତ୍ରୀ ପ୍ରେମିକର ଜୀବନ । ଗତକାଲି ବିଳମ୍ବିତ ରାତିରେ କଟକ କଲେଜ ଛକରେ ଘଟିଛି ଏହି ଲୋମ ଟାଙ୍କୁରା ହତ୍ୟାକାଣ୍ଡ । ମୃତ ବ୍ୟକ୍ତି ଜଣକ ହେଇଛନ୍ତି ରାହାମା ଅଞ୍ଚଳର ସନାତନ ଦାସ। ଏଥିରେ ମହିଳା ଜଣଙ୍କ ଗୁରୁତର ହୋଇଥିବାରୁ ତାଙ୍କୁ କଟକ ବଡ ମେଡିକାଲରେ ଭର୍ତ୍ତି କରାଯାଇଛି ।
ମିଳିଥିବା ସୂଚନାଅନୁଯାୟୀ ରାକେଶ ବିଶ୍ବାଳ ଓ ମାଳତୀ ବିଶ୍ବାଳ ସ୍ବାମୀ ସ୍ତ୍ରୀ । ଉଭୟଙ୍କ ମଧ୍ୟରେ ଝଗଡା ହେବା ପରେ ମାଳତୀ ସନାତନଙ୍କ ପାଖରେ ରହୁଥିଲେ । ରାକେଶ ଏହା ସହ୍ୟ କରିନପାରି ରକ୍ତମୁଖା ହୋଇ ସନାତନଙ୍କୁ ନିର୍ମମ ଭାବରେ ହତ୍ୟା କରିଥିଲେ । ଏନେଇ ଅଭିଯୋଗ ହେବା ପରେ ଘଟଣାସ୍ଥଳରେ କଟକ ଡିସିପି ପହଞ୍ଚି ଛାନଭିନ ଆରମ୍ଭ କରିଥିଲେ ।
ତେବେ ତଦନ୍ତ ପରେ ଅଭିଯୁକ୍ତ ରାକେଶ ବିଶ୍ୱାଳକୁ ସିଡିଏ ବସ୍ତି ଅଞ୍ଚଳରୁ ଗିରଫ କରିଛି ମାଲଗୋଦାମ ଥାନା ପୋଲିସ ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
