କଟକ: ମର୍ଚ୍ଚାଣ୍ଟନେଭି (Merchant navy)ରେ ଚାକିରୀ କରେଇ ଦେବା ନାଁ ରେ ଠକେଇ। ଏଭଳି ଘଟଣା ଦେଖିବାକୁ ମିଳିଛି ସିଲଭର ସିଟିରେ । ଏହି ମାମଲାରେ ଜଣକୁ ଗିରଫ କରିଛି କଟକ ଚଉଳିଆଗଞ୍ଜ ଥାନା ପୋଲିସ। ଗିରଫ ଯୁବକ ହେଲେ କଟକ ସୋମପୁର ଅଞ୍ଚଳର ସୌମ୍ୟ ରଞ୍ଜନ ମିଶ୍ର।
ମର୍ଚ୍ଚାଣ୍ଟନେଭିରେ ଯେଉଁ ଯୁବକ ଯୁବତୀ ଚାକିରୀ ପାଇଁ ଆବେଦନ କରିଥିଲେ ସେମାନଙ୍କ ଡାଟା ସଂଗ୍ରହ କରି ସେମାନଙ୍କୁ ଯୋଗାଯୋଗ କରି ଦୁବାଇରେ ଚାକିରୀ, ଭିସା, ଫ୍ଲାଇଟ ଟିକେଟ କରାଇ ଦେବ କହି ମୋଟା ରକମର ଟଙ୍କା ଲୁଟିଥିଲା । ଏହା ସହିତ ନିଜକୁ ଓଡିଶା ପୋଲିସର ପୂର୍ବତନ ପୋଲିସ ଡିଜିଙ୍କ ବଡ଼ ପୁଅ କହି ଯୁବପିଢ଼ିଙ୍କୁ ଟାର୍ଗେଟ କରୁଥିଲା । ମହାନଦୀ ବିହାର ଅଞ୍ଚଳର ଜଣେ ମହିଳାଙ୍କ ଠାରୁ ସେ ୪୦,୦୦୦ ଟଙ୍କା ଠକି ନେଇଥିଲା ।
ଏନେଇ ମହିଳା ଜଣକ ଥାନାରେ ଅଭିଯୋଗ କରିଥିଲେ। ପରେ ଚଉଳିଆଗଞ୍ଜ ଥାନା ଅଧିକାରୀ ଶଶିକାନ୍ତ ରାଉତ ସ୍ପେଶାଲ ସ୍ୱାର୍ଡ ଟିମ ସହାୟତାରେ ସୌମ୍ୟ ରଞ୍ଜନଙ୍କୁ ଗିରଫ କରିଥିଲେ । ଏହାପରେ ତାଙ୍କୁ ଆଜି କୋର୍ଟ ଚାଲାଣ କରାଯାଇଛି । ଗିରଫ ବେଳେ ତାଙ୍କ ନିକଟରୁ ଏକ କାର, ୩୮ ହଜାର ଟଙ୍କା, ମର୍ଚ୍ଚାଣ୍ଟନେଭି ଟୋପି, ପୋଷାକ, କାର୍ଡ଼ ଓ ଗୁରୁତ୍ୱପୂର୍ଣ କାଗଜପତ୍ର ଜବତ କରାଯାଇଛି ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
