କଟକ: ଚୌଦ୍ବାର ବ୍ଲକ କହ୍ନେଇପୁର ପଞ୍ଚାୟତର ବରପଦା, ଗରୁଡଗାଁ, ଶାଳଗାଁ ଗ୍ରାମରେ ଦୁଇ ହାତୀଙ୍କ ଉପଦ୍ରବ ଦେଖିବାକୁ ମିଳିଛି। କଟକ ବନଖଣ୍ଡ ଡାଳିଯୋଡା ରେଞ୍ଜ ଅଞ୍ଚଳରେ ଥିବା ଶହଶହ ଏକର ଧାନ ଫସଲ ନଷ୍ଟ କରିଛନ୍ତି ୨ ହାତୀ । ଖବରପାଇ ଘଟଣା ସ୍ଥଳରେ ବନବିଭାଗ ପହଞ୍ଚି ହାତୀଙ୍କୁ ଘଉଡାଇବାକୁ ଜାରି ରଖିଛି ଉଦ୍ୟମ ।
ଗତ କିଛିବର୍ଷ ହେବ କପିଳାସ ଜଙ୍ଗଲରୁ ୧୨ରୁ ଉର୍ଦ୍ଧ ହାତୀପଲ ଆସି ଟାଙ୍ଗୀ ଚୌଦ୍ବାର ବ୍ଲକରେ ଆତଙ୍କ ସୃଷ୍ଟି କରିଛନ୍ତି । ରବିବାର ହାତୀପଲ ଭିତରୁ ଦୁଇ ହାତୀ ଅଲଗା ହୋଇ ଟାଙ୍ଗୀ ଚୌଦ୍ବାର ବ୍ଲକରେ ଥିବା ବିଭିନ୍ନ ଗ୍ରାମରେ ପଶି ଘରଦ୍ବାର ଭାଙ୍ଗିବା ସହ ଧାନ ବିଲରେ ପଶି ଫସଲ ନଷ୍ଟ କରିଛନ୍ତି ।
ଧାନ ଅମଳ ସମୟରେ କ୍ଷେତରେ ପଶି ଦଳିଚକଟି ଶହଶହ ହେକ୍ଟର ଚାଷଜମି ନଷ୍ଟ କରିଛନ୍ତି। ଚାଷୀ ଦୁଇଦୁଇ ଥର ଲଗାଣ ବର୍ଷାରେ ଭାଙ୍ଗିପଡିଥିବା ବେଳେ ଯାହା କଷ୍ଟେମଷ୍ଟେ ଧାନ ବିଲ ସଜାଡିଥିଲା ଏବେ ହାତୀପଲ ଆସି ଚାଷୀର ବର୍ଷସାରାର ଆହାର ଛଡାଇ ନେଇଛନ୍ତି । ଅନ୍ୟପଟେ ହାତୀ ଉପଦ୍ରଵରେ କ୍ଷୟକ୍ଷତି ହୋଇଥିବା ଚାଷୀଙ୍କୁ ସରକାରୀ ସହାୟତା ଯୋଗାଇ ଦିଆଯିବ ବୋଲି କହିଛି ବନବିଭାଗ।
କଟକରୁ ନାରାୟଣ ସାହୁ, ଇଟିଭି ଭାରତ
