କଟକ: ରାଜ୍ୟବ୍ୟାପୀ ଲକଡାଉନ ଲାଗୁ ହୋଇଥିବାବେଳେ ଏହାକୁ ଉଲ୍ଲଙ୍ଘନ କରିବା ଲୋକଙ୍କ ଅଭ୍ୟାସ ପାଲଟିଛି । ବିଭିନ୍ନ ଜାଗାରେ ତାଲାବନ୍ଦ ନିୟମ ଭାଙ୍ଗି ଲୋକଙ୍କ ଗାଡି ସିଜ ହେବା ସହ ଅନେକ ମାମଲା ରୁଜୁ ହୋଇଛି । ନିୟମ ଭାଙ୍ଗିଥିବା ଅଭିଯୋଗରେ ରାଜ୍ୟର ବିଭିନ୍ନ ଥାନାରେ ଶନିବାର ପର୍ଯ୍ୟନ୍ତ ମୋଟ ୫୯୨୪ଟି ମାମଲା ରୁଜୁ କରାଯାଇଛି ।
ଗତ ଏପ୍ରିଲ ୨୪ ତାରିଖରୁ ଶନିବାର ପର୍ଯ୍ୟନ୍ତ ଏହି ସଂଖ୍ୟକ ମାମଲା ରୁଜୁ ହୋଇଛି । ଏନେଇ ପୋଲିସ ମୁଖ୍ୟାଳୟ ପକ୍ଷରୁ ସୂଚନା ଦିଆଯାଇଛି । ଶୁକ୍ରବାର ସକାଳୁ ଶନିବାର ସକାଳ ପର୍ଯ୍ୟନ୍ତ ରାଜ୍ୟର ବିଭିନ୍ନ ଥାନାରେ ୨୧ଟି ମାମଲା ରୁଜୁ କରାଯାଇଛି ।
ଏହି ୨୧ଟି ମାମଲା ମଧ୍ୟରୁ ୧୯ଟି ମାମଲା ତାଲାବନ୍ଦ ନିୟମ ଉଲ୍ଲଙ୍ଘନ ଅଭିଯୋଗରେ ରୁଜୁ ହୋଇଛି । ଗୋଟିଏ ମାମଲା ହୋମ କ୍ବାରେଣ୍ଟାଇନ ଉଲ୍ଲଙ୍ଘନ ପାଇଁ ରୁଜୁ କରାଯାଇଛି । ବାକି ଗୋଟିଏ ମାମଲା ଅନ୍ୟାନ୍ୟ ପାଇଁ ରୁଜୁ କରାଯାଇଥିବା ରାଜ୍ୟ ପୋଲିସ ମୁଖ୍ୟାଳୟ ପକ୍ଷରୁ କୁହାଯାଇଛି ।
କଟକରୁ ନାରାୟଣ ସାହୁ, ଇଟିଭି ଭାରତ
