ଭୁବନେଶ୍ବର: ବେକାରୀକୁ ନେଇ ସରକାରଙ୍କ ବିରୋଧରେ ସ୍ବର ଶାଣିତ କରିବ ଯୁବ କଂଗ୍ରେସ। ସୋସିଆଲ ମିଡିଆରେ ଗ୍ରାମାଞ୍ଚଳ, ବ୍ଲକସ୍ତରରୁ ଯୁବକମାନେ ବେକାରୀ ସମସ୍ୟାକୁ ନେଇ ନିଜର ବକ୍ତବ୍ୟ ରଖିବେ ।
#VoiceOfOdisha ମାଧ୍ୟମରେ ଯୁବ ବକ୍ତାମାନେ ବଢୁଥିବା ବେକାରୀକୁ ନେଇ ନିଜର ବକ୍ତବ୍ୟ ପୋଷ୍ଟ କରିବେ। ଭଲ ବକ୍ତାଙ୍କୁ ଯୁବ କଂଗ୍ରେସର ମୁଖପାତ୍ର ହେବାକୁ ସୁଯୋଗ ମିଳିବ ।
ଆଜି କଂଗ୍ରେସ ଭବନରେ ଏକ ସାମ୍ବାଦିକ ସମିଳନୀରେ ଏହି କ୍ୟାମ୍ପେନର ଶୁଭାରମ୍ଭ କରିଛନ୍ତି ଜାତୀୟ ଯୁବ କଂଗ୍ରେସର ସଚିବ ରିଆଜ ଅହମ୍ମଦ। ଦେଶରେ ଓ ରାଜ୍ୟରେ ବଢୁଥିବା ବେକାରୀକୁ ନେଇ ସରକାରଙ୍କ ବିରୋଧରେ ସ୍ବର ଶାଣିତ କରିବା ପାଇଁ ଯୁବକ ମାନଙ୍କୁ ଆଗକୁ ଆଣିବା ଓ ଯୁବକ ମାନଙ୍କୁ ସଂଗଠିତ କରିବାର ଏହା ଏକ ପ୍ରୟାସ ବୋଲି କହିଛନ୍ତି ଯୁବ କଂଗ୍ରେସ ସଭାପତି ସ୍ମୃତି ରଞ୍ଜନ ଲେଙ୍କା।
ତେବେ ବେକାରୀ ସମସ୍ୟାକୁ ନେଇ ରାହୁଲ ଗାନ୍ଧୀଙ୍କ ପକ୍ଷରୁ #SpeakUpForJob କ୍ୟାମ୍ପେନ ଚାଲିଥିବାବେଳେ ରାଜ୍ୟରେ ଯୁବ କଂଗ୍ରେସ ପକ୍ଷରୁ #VoiceOfOdisha କୁ ନେଇ କ୍ୟାମ୍ପେନ ଆରମ୍ଭ ହୋଇଛି। ଯାହା ଯୁବକଙ୍କ ହକ୍କୁ ନେଇ ସରକାରଙ୍କୁ ଘେରିବ ବୋଲି କୁହାଯାଉଛି ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
