ଭୁବନେଶ୍ବର: ଆଜି ହେଉଛି ବିଶ୍ବ ସାଇକେଲ ଦିବସ । ଲୋକଙ୍କୁ ସାଇକେଲ ଚଳାଇବା ପ୍ରତି ଆକୃଷ୍ଟ କରିବା ଲକ୍ଷ୍ୟ ନେଇ ଗତ 2018 ମସିହାରେ ଜାତିସଙ୍ଘର ସ୍ବତନ୍ତ୍ର ଅଧିବେଶନରେ ଏନେଇ ପ୍ରସ୍ତାବ ଗୃହୀତ ହୋଇଥିଲା । ବାସ୍ ତା ପର ଠାରୁ ପ୍ରତିବର୍ଷ ଏହିଦିନକୁ ବିଶ୍ବ ସାଇକେଲ ଦିବସ ଭାବେ ପାଳନ କରାଯାଉଛି ।
ତେବେ ବିଭିନ୍ନ ଦେଶରେ ଏହାକୁ ଗୁରୁତ୍ବ ଦିଆଯାଇ ସାଇକେଲ ଚାଳକଙ୍କୁ ବିନା ବାଧାରେ ଚଳପ୍ରଚଳ ପାଇଁ ସ୍ବତନ୍ତ୍ର ଟ୍ରାକ ମାନ ପ୍ରସ୍ତୁତ କରାଯାଉଛି । ଆମ ରାଜ୍ୟରେ ମଧ୍ୟ ସରକାର ଏନେଇ ପଦକ୍ଷେପ ଗ୍ରହଣ ସ୍ବରୂପ ରାଜଧାନୀ ଭୁବନେଶ୍ବରରେ ସାଇକେଲ ଚଳାଇବା ପାଇଁ ସ୍ବତନ୍ତ୍ର ଟ୍ରାକ ପ୍ରସ୍ତୁତ କରିଥିଲେ । ଲୋକମାନଙ୍କ ମଧ୍ୟରେ ସାଇକେଲ ଚଳାଇବା ଆଗ୍ରହ ବୃଦ୍ଧି ପାଇଁ ମୋ ସାଇକେଲ ଯୋଜନା ଆରମ୍ଭ କରିଥିଲେ ।
କିନ୍ତୁ ସେଥିରେ ସରକାରଙ୍କ ପ୍ରତିବଦ୍ଧତା ଦେଖିବାକୁ ମିଳିଲା ନାହିଁ । ନାମକୁ ମାତ୍ର ଟ୍ରାକ ନିର୍ମାଣ କରି ସରକାର ତାଙ୍କ କାମ ସାରି ବସି ପଡିଛନ୍ତି । ତେବେ ବର୍ତ୍ତମାନର କୋରୋନା ଲକଡାଉନ ଯୋଗୁଁ ଅନେକ ଲୋକ ସାଇକେଲ ପ୍ରତି ଆଗ୍ରହ ପ୍ରକାଶ କରିଥବା ଦେଖିବାକୁ ମିଳିଛି । ଯାହାକୁ ଏକ ସୁଯୋଗ ଭାବେ ନେଇ ଭୁବନେଶ୍ବରକୁ ଭବିଷ୍ୟତରେ ଏକ ସୁସ୍ଥ, ସୁନ୍ଦର ଓ ପରିବେଶ ଉପଯୋଗୀ ସହର ଭାବେ ଗଠନ କରାଯାଇ ପାରିବ ବୋଲି ଡ.ପୀୟୂଷ ରଞ୍ଜନ ରାଉତ କହିଛନ୍ତି ।
ଲୋକମାନଙ୍କୁ ଶାରୀରିକ ଭାବେ ସୁସ୍ଥ ରଖିବା ସହ ଏକ ଆଦର୍ଶ ସହର ଗଢିବା ଓ ସାମାଜିକ ଦୂରତ୍ବ ରକ୍ଷା କରିବାରେ ସାଇକେଲ ମୁଖ୍ୟ ଭୂମିକା ଗ୍ରହଣ କରିପାରିବ ବୋଲି ସେ ଆଶା ପ୍ରକାଶ କରିଛନ୍ତି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
