ଭୁବନେଶ୍ବର: ଭାରତ ବନ୍ଦ ଡାକରା ଦେଲେ ବାମ ଦଳ ସମେତ କେତେକ ଟ୍ରେଡ ୟୁନିୟନ । ୧୨ ଦଫା ଦାବି ନେଇ ଏହି ଭାରତ ବନ୍ଦ ଡାକରା ଦିଆଯାଇଛି। ବାମଦଳ , କେନ୍ଦ୍ରୀୟ ଟ୍ରେଡ ୟୁନିୟନ ଓ ସ୍ବାଧୀନ ଫେଡରେସନ ମିଳିତ ମଞ୍ଚ ପକ୍ଷରୁ ୨୪ ଘଣ୍ଟିଆ ଭାରତ ବନ୍ଦ ଡାକରା ଦିଆଯାଇଛି।
କେନ୍ଦ୍ର ସରକାରଙ୍କ ଦ୍ବାରା ଉପୁଜିଥିବା ସାମ୍ବିଧାନିକ ସଙ୍କଟ, ଅର୍ଥନୈତିକ ମାନ୍ଦାବସ୍ଥା, ବିଭିନ୍ନ ଶିକ୍ଷାନୁଷ୍ଠାନରେ ହିଂସା, ଚାଷୀ ମାରଣ ନୀତି, ଦରଦାମ ଆକାଶ ଛୁଆଁ ବୃଦ୍ଧିର ପ୍ରତିବାଦରେ ଏହି ବନ୍ଦ ଡାକରା ଦିଆଯାଇଛି । ସକାଳ ୬ ଟାରୁ ବନ୍ଦ ପାଳନ ଆରମ୍ଭ ହେବ। ଶାନ୍ତିପୂର୍ଣ୍ଣ ବନ୍ଦ ପାଳନ ପାଇଁ ଜନସାଧାରଣଙ୍କୁ ଅପିଲ କରିଛନ୍ତି ବାମପନ୍ଥୀ ନେତା।
ଅସଙ୍ଗଠିତ ଶ୍ରମିକ, ବ୍ୟାଙ୍କିଙ୍ଗ , ବୀମା କ୍ଷେତ୍ର କର୍ମଚାରୀଙ୍କ ସମେତ ବହୁ ସଂଗଠନ ଓ ସଂସ୍ଥା ଏହି ବନ୍ଦ ପାଳନରେ ସାମିଲ ହେବେ ବୋଲି ବାମଦଳ ପକ୍ଷରୁ କୁହାଯାଇଛି । ତେବେ ବନ୍ଦ ପାଳନରୁ ଅତ୍ୟାବଶ୍ୟକ ସେବାକୁ ବାଦ ଦିଆଯିବ । ହସ୍ପିଟାଲ, ଅଗ୍ନିଶମ, କ୍ଷୀର ପରିବହନ, ପରୀକ୍ଷାର୍ଥୀ, ଭଳି ସେବା ଗୁଡିକୁ ଧର୍ମଘଟ ପରିସରୁ ବାହାରେ ରଖାଯାଇଛି ବୋଲି ବରିଷ୍ଠ ବାମନେତା ରାମକୃଷ୍ଣ ପଣ୍ଡା କହିଛନ୍ତି।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
