ପୁରୀ : ବଗଲା ଧର୍ମଶାଳା ଜମି ବିକ୍ରି ନେଇ ରାଜନୀତି ଥମିବା ନାଁ ନେଉନି। ବିଜେପି ବିଜେଡି ଆରୋପ ପ୍ରତ୍ୟାରୋପ ଜାରି ରହିଛି। ଆଜି ଏନେଇ ମୁହଁ ଖୋଲିଛନ୍ତି ବରିଷ୍ଠ ବିଜେପି ନେତା ବିଜୟ ମହାପାତ୍ର । ପ୍ରଥମ ଦଫାରେ ଶ୍ରୀମନ୍ଦିର ଚତୁପାର୍ଶ୍ୱରେ ଅନେକ ମଠ ଭଙ୍ଗା ହେଲା ସେ ସମୟରେ କେହି ମୁହଁ ଖୋଲିଲେ ନାହିଁ । ହେଲେ ବଗଲା ଜମି ବିକ୍ରି ନେଇ ଏବେ ଜୋର ଧରିଛି ପ୍ରଶ୍ନ । ସରକାର କହିଲେ ବିସ୍ଥାପିତ ନୀତି ଘୋଷଣା କରିବେ କିନ୍ତୁ କଲେ ନାହିଁ । ଯେଉଁ 4-5 ଜଣଙ୍କୁ ଦେଇଛନ୍ତି ସେମାନେ ଲଜ ମାଲିକ। ସେମାନେ ବିସ୍ଥାପିତ ନୁହଁନ୍ତି ବୋଲି ବିଜୟ କହିଛନ୍ତି ।
ସେମାନଙ୍କ ଠାରୁ ସରକାର ଜମି କିଣିଛନ୍ତି । ଗୋଟିଏ ଜମିର ଭାଲ୍ୟୁ, ସୋଲାସିୟମ ଏବଂ ରେଜିଷ୍ଟ୍ରେସନ ଫିସ ସହ ସମସ୍ତଙ୍କୁ ଯଥେଷ୍ଟ ପରିମାଣର ଟଙ୍କା ଦେଇଛନ୍ତି ସରକାର । ସରକାର ସେମାନଙ୍କ ଲଜିଂକୁ 4 ଗୁଣ ଦରରେ କିଣିଥିବା ସେ ଅଭିଯୋଗ କରିଛନ୍ତି । ଅଧିଗ୍ରହଣ ନାଁରେ ସରକାର ପୁରା ସମ୍ପତ୍ତିକୁ କିଣିଦେଇଛନ୍ତି । ପୁରୀ ଭଳି ଜମି ଅଧିଗ୍ରହଣ ପଦ୍ଧତି ନିଆଯାଇଥିଲେ ପୋସ୍କୋ ଭଳି ଅନେକ କମ୍ପାନୀ ରାଜ୍ୟରୁ ଫେରି ଯାଇ ନଥାନ୍ତେ ବୋଲି ସେ କହିଛନ୍ତି।
କିଛି ମୁଷ୍ଟିମେୟ ଆଇଏଏସ ଅଫିସର ଭାବୁଛନ୍ତି ସେମାନେ ସର୍ବେସର୍ବା । ଆମେ ଯାହା ଇଚ୍ଛା ହେବ କରିବୁ। ଯେହେତୁ ବର୍ତ୍ତମାନ ମୁନିସିପାଲିଟି ନାହିଁ , ଜିଲ୍ଲାପାଳ ମନ ଇଚ୍ଛା ବିକିଦେଲେ । ବାମ ହାତରେ ନେଲେ ଡାହାଣ ହାତରେ ଦେଲେ । ଏହା କେଉଁ ଆଇନରେ ଲେଖା ଅଛି ବୋଲି ବିଜୟ ପ୍ରଶ୍ନ କରିଛନ୍ତି । ତୁରନ୍ତ ସେ ଅଫିସରଙ୍କୁ ବନ୍ଧା ଯିବା ଦରକାର । ରାଜସ୍ୱ ବିଭାଗ, ଆଇନ ବିଭାଗ ଜବାବ ରଖିବା ଦରକାର । ସରକାର ଏହାର ପୂର୍ଣ୍ଣାଙ୍ଗ ତଦନ୍ତ କରନ୍ତୁ । ମୁଖ୍ୟମନ୍ତ୍ରୀ ମାମଲାକୁ ନିଜ ଟେବୁଲକୁ ଆଣନ୍ତୁ ବୋଲି ସେ ଦାବି କରିଛନ୍ତି । ଏବଂ ଯେଉଁ ଅଫିସର ମାନେ ଏଭଳି କରିଛନ୍ତି । ତାଙ୍କ ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ।
ସରକାରଙ୍କ ପାଖରେ ସମସ୍ତ ତଥ୍ୟ ଅଛି। ତେଣୁ ସରକାର ତଥ୍ୟ ପ୍ରଦାନ କରନ୍ତୁ । ଯେଉଁମାନଙ୍କୁ ଜମି ଦିଆଯାଇଛି ସେମାନେ ବିସ୍ଥାପିତ ନୁହଁନ୍ତି। ଏହା ଲ୍ୟାଣ୍ଡ ଫର ଲ୍ୟାଣ୍ଡ ସ୍କିମ୍ ନୁହେଁ ବୋଲି ବିଜୟ କହିଛନ୍ତି। ବିଜୟଙ୍କ ଏଭଳି ବୟାନ ବିବାଦକୁ ନୂଆ ମୋଡ଼ ଦେଇଛି।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
