ଭୁବନେଶ୍ବର: କୋଟିଆ ପ୍ରସଙ୍ଗରେ ପୁଣି ରାଜ୍ୟ ରାଜନୀତିରେ ଉଷ୍ମତା । ଏପଟେ କୋଟିଆ ପ୍ରସଙ୍ଗରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ମୁହିଁ ଖୋଲିଛନ୍ତି । ଆମେ ଦୀର୍ଘ ବର୍ଷ ହେଲା ଏହି ପ୍ରସଙ୍ଗରେ ଅବହେଳା କରି ଆସିଛେ । ହେଲେ ଦଳମତ ନିର୍ବିଶେଷରେ ଏକତ୍ର ହୋଇ ଏହାର ସମାଧାନ କରିବା ସମୟ ଆସିଛି ବୋଲି କେନ୍ଦ୍ରମନ୍ତ୍ରୀ କହିଛନ୍ତି ।
କୋଟିଆ ପ୍ରସଙ୍ଗକୁ ଯେତେ ଗୁରୁତ୍ବର ସହ ନେବା କଥା ଆମେ ତାହା କରିବାରେ ସଫଳ ହୋଇନାହୁଁ । ଏହି ଅଞ୍ଚଳର ବିକାଶ ତଥା ସ୍ଥାନୀୟ ଭାଇ ଭଉଣୀମାନଙ୍କୁ ଭାବଗତ ଭାବରେ ଯୋଡ଼ି ରଖିବାକୁ ଯେତିକି ଗୁରୁତ୍ବ ଦେବା କଥା ଆମେ ଦେଇନାହୁଁ ବୋଲି କହିଛନ୍ତି ଧର୍ମେନ୍ଦ୍ର ।
ଏବେ ଯେତେବେଳେ ଆନ୍ଧ୍ର ସରକାର କୋଟିଆ ଉପରେ ଅଧିକାର ଜାହିର କରିବା ଆରମ୍ଭ କରିଛି, ଦଳ ମତ ନିର୍ବିଶେଷରେ ଆମେ ସମସ୍ତେ ଓଡ଼ିଶାବାସୀ ଏକ ହୋଇ ଏହି ସମସ୍ୟାର ସମାଧାନ ବାହାର କରିବାକୁ ସମୟର ସୁଦୂପଯୋଗ ଜରୁରୀ ବୋଲି କହିଛନ୍ତି ଧର୍ମେନ୍ଦ୍ର । ମୁଁ କୋଟିଆ ଅଞ୍ଚଳ ଗସ୍ତ କରିଥିଲି । ସେ ଅଞ୍ଚଳର ଅଧିବାସୀ ମାନଙ୍କ ସହିତ ବ୍ୟକ୍ତିଗତ ଭାବରେ ସୀମା ବିବାଦ ବିଷୟରେ ଆଲୋଚନା କରିଛି ବୋଲି ସେ କହିଛନ୍ତି ।
