ଭୁବନେଶ୍ବର: ରାଜ୍ୟରେ ସମସ୍ତ ଚାରୋଟି ପର୍ଯ୍ୟାୟରେ ମତଦାନ ପରିସମାପ୍ତି ଘଟିଛି । ଏବେ କେବଳ ଅପେକ୍ଷା ଆସନ୍ତା ୨୩ ତାରିଖରେ ହେବାକୁ ଥିବା ଭୋଟ ଗଣତି ଦିନକୁ । ଏବେ ଭୋଟ୍ ଗଣତି ପାଇଁ ରାଜଧାନୀସ୍ଥିତ ଗୀତ ଗୋବିନ୍ଦ ଭବନରେ ୨ ଦିନିଆ କର୍ମଶାଳା ଅନୁଷ୍ଠିତ ହୋଇଛି । ଆଜି (ସୋମବାର)ଓ ଆସନ୍ତାକାଲି(ମଙ୍ଗଳବାର) ଦୁଇ ଦିନ ଯାଏଁ ଭୋଟ ଗଣତି ନେଇ ରିଟର୍ଣ୍ଣିଂ ଅଫିସରଙ୍କୁ ତାଲିମ ଦିଆଯିବ ।
ଏହି ପ୍ରଶିକ୍ଷଣ ଶିବିରରେ ପ୍ରଥମ ଦିନରେ ସୋମବାର ୧୧ ଜିଲ୍ଲାର ଜିଲ୍ଲାପାଳ, ଉପ ଜିଲ୍ଲାପାଳ, ଏଡିଏମ୍ ତଥା ECI ଉପସ୍ଥିତ ରହିଛନ୍ତି । ଏହାସହ ଏହି 11ଟି ଜିଲ୍ଲାର ୭୯ଟି ବିଧାନସଭା କ୍ଷେତ୍ରର ୪୯ ରିଟର୍ଣ୍ଣିଂ ଅଫିସର କର୍ମଶାଳାରେ ସାମିଲ ହୋଇଛନ୍ତି । ସେହିପରି ପ୍ରଶିକ୍ଷଣର ଦ୍ବିତୀୟ ଦିନରେ ୧୯ ଜିଲ୍ଲାର ଜିଲ୍ଲାପାଳ, ଉପ ଜିଲ୍ଲାପାଳ ଓ ଏଡିଏମ୍ ତଥା ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ଓ ECIର ବରିଷ୍ଠ ଅଧିକାରୀ ଉପସ୍ଥିତ ରହିବେ । 2ଦିନିଆ ଏହି ପ୍ରଶିକ୍ଷଣ ଶିବିରରେ ସୁରକ୍ଷିତ, ଶୃଙ୍ଖଳିତ ଭାବରେ ଭୋଟ ଗଣତି ପାଇଁ ସମସ୍ତ ଦିଗ ବିଷୟରେ ଆଲୋଚନା କରାଯିବାର କାର୍ଯ୍ୟକ୍ରମ ରହିଛି ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
