ଭୁବନେଶ୍ବର: ଥମୁନି ଟୋକନ ତାତି । ଗୃହ ବାହାରେ ଭିତରେ ଚାଲିଛି ତୁମ୍ବୀ ତୋଫାନ । ବିଧାନସଭା ଭିତରେ ଖୋଦ ସରକାରୀ ଦଳର ବିଧାୟକ ଏନେଇ ଉଦବେଗ ପ୍ରକାଶ କରିଛନ୍ତି । ବରଗଡ଼ରେ ଧାନ କିଣାରେ ଅବ୍ୟବସ୍ଥାକୁ ନେଇ ପ୍ରଶ୍ନ ଉଠାଇଥିଲେ ଶାସକ ଦଳର 3 ବିଧାୟକ । ଏପରିକି ସ୍ବଚ୍ଛତା ନାଁରେ ଚାଷୀଙ୍କୁ ହନ୍ତସନ୍ତ କରାନଯାଉ ବୋଲି ଦାବି କରାଯିବା ସହ ଟୋକେନ ବ୍ୟବସ୍ଥାକୁ କୋହଳ କରିବାକୁ ଦାବି ହୋଇଥିଲା ।
ବରଗଡ଼ରେ 2018ରେ ଧାନକିଣା ଅନିୟମିତତା କଥା ଉଠାଇଥିଲେ ବରଗଡ ବିଧାୟକ । ସ୍ବଚ୍ଛତା ନାଁରେ ଚାଷୀଙ୍କୁ ହନ୍ତସନ୍ତ କରାନଯାଉ ବୋଲି କହିଥିଲେ ବିଧାୟକ ଦେବେଶ ଆଚାର୍ଯ୍ୟ । ସେହିପରି ସରକାରୀ ଦଳର ଉପମୁଖ୍ୟ ସଚେତକ ରୋହିତ ପୂଜାରୀ ମଧ୍ୟ ଟୋକେନ ବ୍ୟବସ୍ଥାରେ ଉଦବେଗ ପ୍ରକାଶ କରିଥିଲେ । ଟୋକେନ ବ୍ୟବସ୍ଥା ଯୋଗୁଁ ଧାନ ଉଠିବା ଆରମ୍ଭ ହୋଇଛି । ହେଲେ ବଳକା ରହିଯାଇଥିବା ଧାନ ପାଇଁ 15 ଦିନ ମଧ୍ୟରେ ଟୋକେନ ଦିଆଯାଉଛି । ହେଲେ ଧାନ କେବେ ଉଠିବ ଚାଷୀ ଜାଣିପାରୁନଥିବାବେଳେ କମ ସମୟ ମଧ୍ୟରେ ଟୋକେନ ଦେବାକୁ ଦାବି କରିଥିଲେ ରୋହିତ ପୂଜାରୀ । ସେହି ସମାନ ପ୍ରଶ୍ନକୁ ନେଇ ମନ୍ତ୍ରୀ ଦିବ୍ୟଶଙ୍କର ମିଶ୍ର ମଧ୍ୟ ଗୃହରେ ଉପସ୍ଥାପନା କରିଥିଲେ ।
ଯାହାର ଉତ୍ତରରେ ଯୋଗାଣ ମନ୍ତ୍ରୀ କହିଥିଲେ 13ଟି ପାକ୍ସ ଉପରେ ଚଢାଉ କରାଯାଇଛି । ଧାନ କିଣାରେ ଆଧାର ସିଡିଂ ବାଧ୍ୟତାମୂଳକ । ନଚେତ ବାହାରୁ ବେପାରୀ ପଶି ଆସିବେ ବୋଲି କହିଥିଲେ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ । ଧାନ କିଣାରେ ଓଡ଼ିଶା ସୀମାରେ ହେଉଥିବା ଷଡଯନ୍ତ୍ର ସଫଳ ହେବ ନାହିଁ ବୋଲି ସେ କହିଥିଲେ ।
ଯେଉଁ ସ୍ଥାନରେ ଇଣ୍ଟରନେଟ ନାହିଁ ସେଠାରେ କିପରି ଟେକୋନ ଦିଆଯିବ ସେ ନେଇ ପ୍ରଶ୍ନ କରିଥିଲେ ଶାସକ ଦଳ । ଯାହାର ଉତ୍ତର ଦେବାକୁ ଯାଇ ବିଭାଗୀୟ ମନ୍ତ୍ରୀ କହିଥିଲେ, ସମ୍ବଲପୁରରେ 102 ଧାନ କିଣା କେନ୍ଦ୍ରରୁ 42ଟି କାର୍ଯ୍ୟକ୍ଷମ ହୋଇଛି । 10790 ଟୋକେନ ଆବେଦନ କରିଥିବାବେଳେ ସେଥିରୁ 7400 ଚାଷୀ ଟୋକେନ ପାଇଛନ୍ତି । 80,131 ମେଟ୍ରିକ ଟନ ଧାନ କିଣିଛନ୍ତି ସରକାର । 923 ଜଣ ଚାଷୀ ଧାନ ବିକ୍ରୀ କରିଛନ୍ତି । ଗତବର୍ଷ 70 ହଜାର ମେଟ୍ରିକ ଟନ ଧାନ କିଣାଯାଇଥିବାବେଳେ ଚଳିତ ବର୍ଷ 80 ହଜାର ମେଟ୍ରିକ ଟନ ଧାନ ସରକାର କିଣିସାରିଛନ୍ତି । ଟୋକେନ ବ୍ୟବସ୍ଥା ପାଇଁ ଧାନ କିଣା ବ୍ୟବସ୍ଥା ସ୍ବଚ୍ଛ ହୋଇଛି । ତେଣୁ ସମସ୍ତ ସଦସ୍ୟ ସହଯୋଗ କରିବାକୁ ନିବେଦନ କରିଛନ୍ତି । ଏପରିକି କେହି ପ୍ରକୃତ ଚାଷୀ ବଳି ପଡିଥିଲେ ଜିଲ୍ଲାପାଳ ତଦନ୍ତ କରି ତାଙ୍କୁ ସାମିଲ କରିବେ କହିଥିଲେ ବିଭାଗୀୟ ଅଧିକାରୀ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
