ଭୁବନେଶ୍ବର: ସମଗ୍ର ବିଶ୍ବ ସ୍ବଚ୍ଛତା ଦିଗରେ ସଚେତନ ଥିବାବେଳେ ସୋମବାର ପାଳିତ ହୋଇଛି ବିଶ୍ବ ଶୌଚାଳୟ ଦିବସ । ଏନେଇ ରାଜଧାନୀ ଭୁବନେଶ୍ବରର ପ୍ରମୁଖ ସ୍ବେଚ୍ଛାସେବୀ ସଂଗଠନ 'ସିଫାର' ପକ୍ଷରୁ ସଚେତନତା କାର୍ଯ୍ୟକ୍ରମ ଆୟୋଜିତ ହୋଇଛି । ବିଶ୍ବବାସୀଙ୍କ ପାଇଁ ଶୌଚାଳୟର ସ୍ଥିତି ଓ ଆବଶ୍ୟକତାକୁ ଜଣାଇବା ଉଦ୍ଦେଶ୍ୟରେ ଏହି କାର୍ଯ୍ୟକ୍ରମର ଆୟୋଜନ କରାଯାଇଥିଲା ।
କାର୍ଯ୍ୟକ୍ରମ ମାଧ୍ୟମରେ ସ୍ମାର୍ଟସିଟିର ସମସ୍ତ ନାଗରିକଙ୍କୁ ବିଶ୍ବ ଶୌଚାଳୟ ଦିବସର ବାର୍ତ୍ତା ଦେବା ପାଇଁ ପଦଯାତ୍ରାର ଆୟୋଜନ କରାଯାଇଥିଲା । ସ୍ବଚ୍ଛତା ମଡେଲ ପ୍ରଦର୍ଶନୀ ଏବଂ ଭୁବନେଶ୍ବରରେ ଶୌଚାଳୟର ଆବଶ୍ୟକତା ନେଇ ଆଲୋଚନା ହୋଇଥିଲା । ସଭ୍ୟ ମାନବ ପାଇଁ ଶୌଚାଳୟ ଆତ୍ମସମାନର ସୂଚକ । ସମସ୍ତେ ଏହାକୁ ହୃଦୟଙ୍ଗମ କରି ଶୌଚାଳୟ ବ୍ୟବହାରକୁ ଆପଣାଇଲେ ଏହା ବିକାଶକୁ ତ୍ବରାନ୍ବିତ କରିପାରିବ । ସହରାଞ୍ଚଳ ବିକାଶରେ ସ୍ବଚ୍ଛତାର ଅବଦାନ ଅତ୍ୟନ୍ତ ମହତ୍ବପୂର୍ଣ୍ଣ । ସବୁ ସ୍ଥାନରେ ସ୍ବଚ୍ଛତା ବଜାୟ ରଖିବାକୁ ସମସ୍ତଙ୍କୁ ଆହ୍ବାନ ଦିଆଯାଇଛି ।
ସାରା ରାଜ୍ୟର ସହରାଞ୍ଚଳ ଗୁଡିକରେ ସ୍ବଚ୍ଛ ଏବଂ ହାଇବ୍ରିଡ୍ ଶୌଚାଳୟକୁ ପ୍ରାଧାନ୍ୟ ଦିଆଯାଉଛି ବୋଲି ଗୃହ ଏବଂ ନଗର ଉନ୍ନୟନ ବିଭାଗ ପ୍ରମୁଖ ସଚିବ ଜି.ମାଥିଭାଥେ ନାନ କହିଛନ୍ତି । ସେହିପରି ସମାଜର ପ୍ରତ୍ୟେକ ବର୍ଗ ପାଇଁ ସ୍ବଚ୍ଛ ଶୌଚାଳୟ ଉପଯୋଗୀ ହେବା ଦରକାର । ଯେପରିକି କିନ୍ନର, ଦିବ୍ୟାଙ୍ଗ, ମହିଳା ଏବଂ ଶିଶୁ ଆଦିଙ୍କ ପାଇଁ ନିର୍ମିତ ଶୌଚାଳୟ କାମରେ ଆସିବା ଦରକାର ବୋଲି ସିଫାର ପରିଚାଳକ ସୌମ୍ୟା ମିଶ୍ର କହିଛନ୍ତି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ