ଭୁବନେଶ୍ବର: ଆଜି ବିଶ୍ବ ଶିଶୁ ଶ୍ରମିକ ବିରୋଧୀ ଦିବସ । ଅନ୍ତର୍ଜାତୀୟ ଶ୍ରମିକ ସଂଗଠନ ଆନୁକୂଲ୍ୟରେ 2002ରୁ ପ୍ରତି ବର୍ଷ ଜୁନ 12 ରେ ଏହି ଦିବସ ପାଳିତ ହୋଇ ଆସୁଛି । ଏହି ଅବସରରେ ଶିଶୁ ଶ୍ରମିକ ରୋକିବା ଦିଗରେ ଅଧିକ କାର୍ଯ୍ୟ କରିବା ସହ ଶିଶୁମାନେ ଦେଶର ମୂଳଦୁଆ ଓ ଆମର ଭବିଷ୍ୟତ ବୋଲି ଟ୍ବିଟ କରି କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ଓଡିଶାରେ ସମସ୍ତ ପ୍ରକାରର ଶିଶୁ ଶ୍ରମିକଙ୍କୁ ଶେଷ କରିବା ଏବଂ ଉଜ୍ଜ୍ବଳ ତଥା ସମୃଦ୍ଧ ହେବା ପାଇଁ ଏକ ଅନୁକୂଳ ଜଳବାୟୁ ସୃଷ୍ଟି କରିବାକୁ ପ୍ରତିବଦ୍ଧତାକୁ ନିଶ୍ଚିତ କରିବାକୁ ପ୍ରତିଜ୍ଞା କରିବା ବୋଲି କହିଛନ୍ତି ମୁଖ୍ୟମନ୍ତ୍ରୀ ।
ସେହିପରି ଶିଶୁ ଶ୍ରମିକ ବିରୋଧୀ ବିଶ୍ବ ଦିବସ ଅବସରରେ ମହିଳା ଶିଶୁ କଲ୍ୟାଣ ମନ୍ତ୍ରୀ ସ୍ମୃତି ଇରାନୀ ଟ୍ବିଟ କରି କହିଛନ୍ତି ଯେ ପିଲାମାନେ ଆମ ଜାତିର ଭବିଷ୍ୟତ | ଆମ ପିଲାମାନଙ୍କୁ ଶିଶୁ ଶ୍ରମର ଦୁଷ୍ଟତାରୁ ରକ୍ଷା କରିବା ପାଇଁ ଆଜି ଏବଂ ପ୍ରତିଦିନ ନିଜକୁ ଉତ୍ସର୍ଗ କରିବା | 1098 ଡାଏଲ୍ କରନ୍ତୁ ଏବଂ ଶିଶୁ ଶ୍ରମ ବିରୁଦ୍ଧରେ କର୍ତ୍ତୃପକ୍ଷଙ୍କୁ ସତର୍କ କରାନ୍ତୁ । ଆସନ୍ତୁ ସଭିଏଁ ଏକତ୍ରିତ ହୋଇ ଶିଶୁ ଶ୍ରମକୁ ସମୂଳେ ନାସ କରିବା ଦିଗରେ କାର୍ଯ୍ୟ କରିବା ବୋଲି ଟ୍ବିଟ କରି କହିଛନ୍ତି ସ୍ମୃତି ଇରାନୀ ।
ଏପରି ଅନେକ ସ୍ଥାନରେ ଦେଖାଦେଇଛି ଯେ, ଅଭିଭାବକମାନେ ପରିସ୍ଥିତିରେ ପଡି ନିଜ ସନ୍ତାନକୁ ପଢାଇବା ପରିବର୍ତ୍ତେ କାମରେ ଲଗାଇଥାନ୍ତି । ଘରେ ହେଉ, କିମ୍ବା ବଡ ବଡ ଇଣ୍ଡଷ୍ଟ୍ରୀରେ ଶିଶୁ ଶ୍ରମିକ ଥିବା ଖବର ଅନେକ ବାର ସାମନାକୁ ଆସିଥାଏ । ଏହି ବେଆଇନ କାର୍ଯ୍ୟରେ ଜନସଚେତନତା ସୃଷ୍ଟି କରିବା ଏହାର ମୂଳ ଲକ୍ଷ୍ୟ । ବିଶ୍ବରେ ଏବେ ଶିଶୁ ଶ୍ରମିକ ସଂଖ୍ୟା ରହିଛି 22 କୋଟି । ଯେଉଁମାନଙ୍କର ବୟସ ରହିଛି 5 ରୁ 14 ବର୍ଷ । ସେହିପରି ଭାରତରେ ଏହି ବୟସର ଶିଶୁ ଶ୍ରମିକଙ୍କ ସଂଖ୍ୟା ରହିଛି ପ୍ରାୟ 50 ଲକ୍ଷ ।
