ଭୁବନେଶ୍ବର: ଲୋୟର ପିଏମଜିରେ ଚାଲିଛି ସ୍ବାଧୀନତା ଦିବସର ସେଲିବ୍ରେସନ । ହାତରେ ତ୍ରିରଙ୍ଗା, ମୁଣ୍ଡରେ ତ୍ରିରଙ୍ଗା, ମୁହଁରେ ତ୍ରିରଙ୍ଗା, ଛାତିରେ ତ୍ରିରଙ୍ଗା, ତିନି ରଙ୍ଗର ଶାଢି ଓ କୁର୍ତ୍ତାରେ ସଜେଇ ହୋଇଛି ସାରା ଶରୀର । ରାଜଧାନୀ ଲୋୟର ପିଏମଜିରେ ଦେଖିବାକୁ ମିଳିଥିଲା କିଛି ଏମିତି ଦୃଶ୍ୟ ।
ଏମାନେ ଥିଲେ 'ବନ୍ଦେ ମାତରମ ଅନୁଷ୍ଠାନ'ର ସଦସ୍ୟ । ଖାସ୍ କରି ସ୍ବାଧୀନତା ଦିବସ ହେଉ ବା ସାଧାରଣତନ୍ତ୍ର ଦିବସ ପୂର୍ବରୁ ଲୋୟର ପିଏମଜିରେ ପହଞ୍ଚିଯାନ୍ତି ଏମାନେ । ପଥପ୍ରାନ୍ତ ନାଟକ ଜରିଆରେ ତ୍ରିରଙ୍ଗା ସମ୍ପର୍କରେ ଲୋକଙ୍କୁ ସଚେତନ କରିବା ଏମାନଙ୍କ ମୁଖ୍ୟ ଉଦ୍ଦେଶ୍ୟ ଥାଏ ।
ଜାତି, ଧର୍ମ, ବର୍ଣ୍ଣ ନିର୍ବିଶେଷରେ ସମସ୍ତେ କିପରି ଏକ୍ ହୋଇ ସ୍ବାଧୀନତା ଦିବସ ଓ ସାଧାରଣତନ୍ତ୍ର ଦିବସକୁ ଅନ୍ୟ ଛୁଟିଦିନ ପରି ପାଳିବେ ସେ ନେଇ ଲୋକଙ୍କୁ ବାଣ୍ଟନ୍ତି ବାର୍ତ୍ତା । ଚଳିତବର୍ଷ ସେମାନଙ୍କର ବାର୍ତ୍ତା ରହିଛି 'ୱାନ ନେସନ ୱାନ ଫ୍ଲାଗ'। ଯାହାକୁ ନେଇ ୩୭୦ ଉଚ୍ଛେଦକୁ ସମର୍ଥନ କରି ପାଳିଛନ୍ତି ।
ତେବେ ଏହି ସଦସ୍ୟଙ୍କ ଭିତରେ ପ୍ରହଲାଦ ଜଣେ ସଦସ୍ୟ ଅଛନ୍ତି । ପେସାରେ ଜଣେ ସେ ରିକ୍ସା ଚାଳକ । ଘର ବାଲେଶ୍ବରର ବାହାନଗା ବ୍ଲକର ଖରିଦା ଗାଁ । ରାଜଧାନୀରେ ରହି ନିଜର ବୃତ୍ତି ସହ ରୁଚି ରଖୁଥିବା ପ୍ରହଲାଦଙ୍କୁ ପିଲାଟି ଦିନୁ ତ୍ରିରଙ୍ଗା ପ୍ରତି ଥିବା ପ୍ରେମ ପ୍ରତ୍ୟେକ ବର୍ଷ ଟାଣି ଆଣେ ଏଠାକୁ ।
କେବଳ ସିଏ ଏକା ନୁହଁନ୍ତି ତାଙ୍କ ସହିତ ସାଥ ଦିଅନ୍ତି ତାଙ୍କ ପୁଅ ତ୍ରିରଙ୍ଗା ପ୍ରିୟଦର୍ଶନ । ସେହିପରି ଅନ୍ୟତମ ସଦସ୍ୟ ପୂର୍ଣ୍ଣଚନ୍ଦ୍ର ସାହୁ ଦେଶପ୍ରେମରେ ବିଭୋର ହୋଇ ନିଜର ଝିଅ ନାଁ ରଖିଛନ୍ତି ଇଣ୍ଡିଆନ୍ ।
ଭୁବନେଶ୍ବରରୁ ତାପସ କୁମାର ପରିଡା, ଇଟିଭି ଭାରତ
