ଭୁବନେଶ୍ବର : ସହର ଛାଡି ଗାଁ ମୁହାଁ ହେଲେଣି ପୂଜକ । ଲକଡାଉନ ଛଡାଇ ନେଲା ରୋଜଗାର । ମନ୍ଦିରମାଳିନୀ ଭୁବନେଶ୍ବରରେ 12 ଶହରୁ ଅଧିକ ଛୋଟ ବଡ ମନ୍ଦିର ରହିଛି । କୋରୋନା କଟକଣା ଯୋଗୁଁ ମନ୍ଦିରରେ ସାଧାରଣ ଦର୍ଶନ ଉପରେ ରୋକ ଲଗାଇବା ପରେ କେବଳ ନୀତିକାନ୍ତି କରାଯାଉଛି । ମନ୍ଦିରକୁ ଭକ୍ତମାନେ ଆସୁ ନ ଥିବାରୁ ପୂଜକଙ୍କ ରୋଜଗାର ବନ୍ଦ ହୋଇଯାଇଛି । ଫଳରେ ପୂଜକଙ୍କ ଆର୍ଥିକ ଅବସ୍ଥା ବିଗିଡିବାରେ ଲାଗିଛି । ଏପରି ଅବସ୍ଥାରେ ପୂଜକମାନେ ଓଳିଏ ଖାଇ ଓଳିଏ ଉପାସରେ ରହୁଥିବା ଅଭିଯୋଗ ହୋଇଛି ।
ରାଜ୍ୟ ସରକାରଙ୍କର ନିଷ୍ପତ୍ତି କ୍ରମେ ରାଜ୍ୟରେ ରହିଥିବା ସମସ୍ତ ମନ୍ଦିରରେ ପୂଜକମାନେ ବିଶେଷ ଭାବରେ ପ୍ରଭାବିତ ହୋଇଛନ୍ତି । ଭକ୍ତ ମନ୍ଦିରୁ ଆସୁ ନ ଥିବାରୁ କିଛି ହାତକୁ ପଇସା ଆସୁନାହିଁ ବୋଲି ଜଣେ ପୂଜକ କହିଛନ୍ତି । ରାଜଧାନୀରେ ପୁରା ପରିବାର ସହିତ ରହୁଥିବା ପୂଜକମାନେ ଏବେ ଗାଁ ମୁହାଁ ହେଉଛନ୍ତି । ଏହି ମହାମାରୀରେ ସରକାର ସମସ୍ତଙ୍କୁ ସହାୟତା ଯୋଗାଇ ଦେଉଥିବାବେଳେ ପୂଜକଙ୍କ ଉପରେ ଦୃଷ୍ଟି ଦେଉ ନ ଥିବା ନିଖିଳ ଓଡିଶା ପୂଜକ ମହାସଂଘର ସଭାପତି କହିଛନ୍ତି । ପୂଜକଙ୍କୁ ରାଜ୍ୟ ସରକାର ମାସିକ 5 ହଜାର ଟଙ୍କା ସହାୟତା ପ୍ରଦାନ କରନ୍ତୁ ବୋଲି ସେ ଦାବି କରିଛନ୍ତି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
