ଭୁବନେଶ୍ବର: ଭାରତୀୟ ଅର୍ଥନୀତିରେ ଦେଖା ଦେଇଥିବା ମାନ୍ଦାବସ୍ଥା ସାମୟିକ । ଖୁବଶୀଘ୍ର ଭାରତ ଏଥିରୁ ମୁକୁଳିବ ଏବଂ ଭବିଷ୍ୟତରେ ଅର୍ଥନୀତିରେ ଉଚ୍ଚ ପ୍ରଗତି ହାସଲ କରିବାର କ୍ଷମତା ରଖିବ ବୋଲି କହିଛନ୍ତି ରିଜର୍ଭ ବ୍ୟାଙ୍କର ଗଭର୍ଣ୍ଣର ଶକ୍ତିକାନ୍ତ ଦାସ ।
ସ୍ଥାନୀୟ ଜୟଦେବ ଭବନ ଠାରେ ଆୟୋଜିତ ବିଶିଷ୍ଟ ସ୍ବାଧୀନତା ସଂଗ୍ରାମୀ ପ୍ରାଣନାଥ ପଟ୍ଟନାୟକଙ୍କ ପୁଣ୍ୟତିଥିରେ ଶକ୍ତିକାନ୍ତ ଦାସ ଯୋଗ ଦେଇଥିଲେ । ଉକ୍ତ କାର୍ଯ୍ୟକ୍ରମରେ ତାଙ୍କୁ ସମ୍ବର୍ଦ୍ଧିତ କରାଯିବା ପରେ ସେ ଦେଶର ଆର୍ଥିକ ସ୍ଥିତି ଉପରେ ଆଲୋଚନା କରିଥିଲେ । ସେ କହିଛନ୍ତି, ବର୍ତ୍ତମାନ ଦେଶର ଅର୍ଥନୀତି କିଛି ସମୟ ପାଇଁ ସ୍ଲୋ ଡାଉନ ଅର୍ଥାତ ଆର୍ଥିକ ମାନ୍ଦାଵସ୍ଥାର ପ୍ରଭାବ ଦେଖିବାକୁ ମିଳୁଛି । ଏଥିରୁ ମୁକୁଳିବାକୁ ସରକାର ଏବଂ ରିଜର୍ଭ ବ୍ୟାଙ୍କର ସାମୂହିକ ପ୍ରଚେଷ୍ଟାରେ ଅନେକ ଗୁଡିଏ ପଦକ୍ଷେପ ଗ୍ରହଣ କରାଯାଇଛି । ସେ ସବୁ ପାରାମିଟରକୁ ଆକଳନ କରିବାରେ ଭାରତର ମାଇକ୍ରୋ ଇକୋନୋମୀ ସହିତ ବିଦେଶୀ ଗଚ୍ଛିତ ପୁଞ୍ଜି ବହୁତ ଭଲ ସ୍ଥିତିରେ ରହିଛି ।
ସେହିଭଳି ଅନେକ ଗୁଡିଏ ପାରାମିଟରକୁ ବିଶ୍ଳେଷଣ କରିବା ପରେ ଭାରତ ଯେଉଁ ଆର୍ଥକ ସଂସ୍କାର ଘୋଷଣା କରିଛି ତାହା ଦୀର୍ଘ ମିଆଦି ଅଟେ । ଭବିଷ୍ୟତରେ ଏହା ବିରାଟ ଆର୍ଥିକ ସଂସ୍କାର ଆଣିବା ସହିତ ଉଚ୍ଚତର ଅର୍ଥନୈତିକ ପ୍ରଗତି ହାସଲ କରିବ ବୋଲି ସଚିକାନ୍ତ ଦାସ କହିଛନ୍ତି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
