ଭୁବନେଶ୍ବର: ନୂଆ ମୋଟର ଯାନ ଆଇନ ଅନୁସାରେ ଟେଣ୍ଟ ହାଉସ ଚଳାଉଥିବା ବ୍ୟକ୍ତି ବିଶେଷ ଅନେକ କ୍ଷତି ସହୁଛନ୍ତି। ସେମାନଙ୍କୁ ଏଥିରେ ରିହାତି ପ୍ରଦାନ କରିବା କିମ୍ବା ସେମାନଙ୍କ ଗାଡି ଯିବା ଆସିବା ପାଇଁ ସ୍ବତନ୍ତ୍ର ସୁବିଧା ପ୍ରଦାନ କରିବାକୁ ଦାବି କରିଛନ୍ତି । ଏନେଇ ସଂଘ ପକ୍ଷରୁ ପୋଲିସ କମିଶନର ଓ ପରିବହନ କମିଶନରଙ୍କୁ ଅବଗତ କରାଯାଇଛି।
ଭୁବନେଶ୍ବର ଟେଣ୍ଟ ହାଉସ ମାଲିକ ସଂଘର ସାଧାରଣ ବାର୍ଷିକ ବୈଠକ ଅନୁଷ୍ଠିତ ହୋଇଛି। ଯେଉଁଥିରେ ରାଜ୍ୟ ମନ୍ତ୍ରିମଣ୍ଡଳର ମନ୍ତ୍ରୀ ଓ ବିଧାୟକମାନେ ଯୋଗ ଦେଇଛନ୍ତି । ସଙ୍ଘ ପକ୍ଷରୁ ତାଙ୍କ ନିକଟରେ ଏ ବିଷୟରେ ଅବଗତ କରାଯାଇଛି। ସେମାନେ ଏ ବିଷୟରେ ଆଲୋଚନା କରିବେ ବୋଲି କହିଛନ୍ତି। ତେବେ ଏନେଇ ଯଦି କୌଣସି ପଦକ୍ଷେପ ନିଆ ନ ଯାଏ ଟେଣ୍ଟ ହାଉସ ମାଲିକଙ୍କ ନିକଟରେ କାମ କରୁଥିବା ହଜାର ହଜାର କର୍ମଚାରୀଙ୍କ ଜୀବନ ଜୀବିକା ହରାଇବେ। ରାଜ୍ୟ ସଂଘ ନେଇଥିବା ନିଷ୍ପତି ଅନୁସାରେ ସଂଘ କୌଣସି ସରକାରୀ କାର୍ଯ୍ୟକ୍ରମରେ ସାମିଲ ନ ହେବାକୁ ନିଷ୍ପତି ନେବ ବୋଲି କହିଛନ୍ତି ସଙ୍ଘର ସଭାପତି ।
କାରଣ ସରକାରୀ କାର୍ଯ୍ୟକ୍ରମରେ ଟେଣ୍ଟ ଗାଡି ଗଲାବେଳେ ତାଙ୍କ ଠାରୁ କୌଣସି ପ୍ରକାର କଟକଣା ଜାରି କରାଯାଉ ନାହିଁ । କିନ୍ତୁ ଘରୋଇ କାର୍ଯ୍ୟକ୍ରମରେ ଟେଣ୍ଟ ଗାଡି ଗୁଡିକ ଯିବା ବେଳେ ତାଙ୍କୁ ଅଟକା ଯିବା ସହିତ ତାଙ୍କ ଠାରୁ ଅଧିକ ପରିମାଣର ଫାଇନ ଆଦାୟ କରାଯାଉଛି। ଯାହାକି ସେମାନଙ୍କ ଦାନାରେ ଧୂଳି ପକାଇବା ସଦୃଶ୍ୟ ଅଟେ ବୋଲି ସଙ୍ଘର ସମ୍ପାଦକ ପ୍ରଦୀପ ଭଟ୍ଟ ପ୍ରକାଶ କରିଛନ୍ତି । ତେଣୁ ସରକାର ସେମାନଙ୍କ ପାଇଁ କିଛି ବ୍ୟବସ୍ଥା କରି ବ୍ୟବସାୟ ବଞ୍ଚିବା ପାଇଁ ସାହାଯ୍ୟ କରିବାକୁ ଟେଣ୍ଟ ହାଉସ ମାଲିକ ସଂଘ ଅନୁରୋଧ କରିଛି ।
ଭୁବନେଶ୍ୱରରୁ ଲକ୍ଷ୍ମୀକାନ୍ତ ଦାସ,ଈଟିଭି ଭାରତ
