ଭୁବନେଶ୍ବର: ବସୁଥିଲା ଚୋରା ବନ୍ଧୁକ ହାଟ । ବନ୍ଧୁକ ପାଇଁ ଶିକାରୀ ବେପାରୀ ଠୁ ଆରମ୍ଭ କରି ପହଞ୍ଚୁଥିଲେ ଗ୍ରାହକ । ଡିମାଣ୍ଡ ଦେଖି ଚାଲୁଥିଲା ବେପାର । ହାତ ତିଆରି ବନ୍ଧୁକ ପାଇଁ ଗ୍ରାହକଙ୍କ ପାଇଁ ଡିମାଣ୍ଡ ଆଉ ଚୋରା ବେପାର ସମ୍ପର୍କରେ ସୁରାକ ପାଇଥିଲା STF ଟିମ୍ । ଢେଙ୍କାନାଳ ଭାପୁର ନିକଟରେ ଗ୍ରାହକମାନେ ଅପେକ୍ଷା କରିଥିବା ବେଳେ ୯ଟି ଦେଶୀ ସିଙ୍ଗଲବୋର ରାଇଫଲ ସହ ଗୋଟିଏ ରିଭଲଭର ଧରି ବିକ୍ରି ପାଇଁ ପହଞ୍ଚିଥିଲେ ବନ୍ଧୁକ ମାଫିଆ । ଠିକ୍ ସେହି ସମୟରେ ମାଡି ବସିଥିଲେ ପୂର୍ବରୁ ଲୁଚିଥିବା STF ଟିମର ଅଧିକାରୀ । ଦୁଇ ଜଣ ଗ୍ରାହକ ଘଟଣାସ୍ଥଳରୁ ଛତ୍ରଭଙ୍ଗ ଦେଇଥିବା ବେଳେ ଦୁଇ ବେପାରୀ STF ହାତରେ ଧରାପଡିଛନ୍ତି ।
ଢେଙ୍କାନାଳରେ ଏଭଳି ବନ୍ଧୁକ ଡିଲ ବେଳେ ଧରାପଡିଛନ୍ତି ମାଫିଆ । ଭାପୁର ନିକଟରୁ ଦୁଇ ମାଫିଆଙ୍କୁ କାବୁ କରିଛି ଟିମ୍ । ଅଭିଯୁକ୍ତମାନେ ହେଲେ କାନ୍ଦି ନାୟକ ଓ ଶ୍ୟାମସୁନ୍ଦର ସେଠି ।
ସୂଚନାଯୋଗ୍ୟ, ଅଭିଯୁକ୍ତମାନେ ନିଜ ହାତରେ ତିଆରି ବନ୍ଧୁକ ତିଆରି କରି ବିକ୍ରି କରୁଥିଲେ । ଗିରଫ ପରେ ସେମାନଙ୍କୁ ଠାରୁ ୯ଟି ଦେଶି ବନ୍ଧୁକ ସହ ଗୋଟିଏ ରିଭଲଭର ଜବତ କରିଛି STF ଟିମ୍ । ୨୦୨୦ରୁ ଏଯାବତ୍ ୫୬ଟି ବନ୍ଧୁକ ସହ ୯୬ ରାଉଣ୍ଡ ଗୁଳି ଜବତ କରାଯାଇଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
