ପୁରୀ: ବିଶ୍ୱବ୍ୟାପୀ ପାଳିତ ହେବ ଗୌଡିୟ ମିଶନ ପ୍ରତିଷ୍ଠାତା ଜଗତଗୁରୁ ଶ୍ରୀଳ ପ୍ରଭୁପାଦଙ୍କ 150ତମ ଜୟନ୍ତୀ । ପଭୁପାଦଙ୍କ ଜୟନ୍ତୀ ଉପଲକ୍ଷେ ସମଗ୍ର ବିଶ୍ୱରେ ସକାରାତ୍ମକ ନବଜାଗରଣ ସୃଷ୍ଟି ସହ ଶ୍ରୀଳ ପ୍ରଭୁପାଦଙ୍କ ଶିକ୍ଷା ଓ ବାର୍ତ୍ତାର ପ୍ରସାର ପାଇଁ 9ଟି ବାହାର ଦେଶ ଓ ଭାରତର 19ଟି ସହରରେ କାର୍ଯ୍ୟକ୍ରମ ଆୟୋଜିତ ହୋଇଛି । ପ୍ରଭୁପାଦଙ୍କ ଜନ୍ମସ୍ଥାନ ପୁରୀରୁ ଆରମ୍ଭ ହେବାକୁ ଥିବା ଏହି କାର୍ଯ୍ୟକ୍ରମକୁ ଫେବୃଆରୀ 20 ତାରିଖରେ ଉଦଘାଟନ କରିବେ ରାଷ୍ଟ୍ରପତି ରାମନାଥ କୋବିନ୍ଦ । 3 ବର୍ଷ ଧରି ଚାଲିବାକୁ ଥିବା ଏହି କାର୍ଯ୍ୟକ୍ରମ 2025ରେ କଲିକତାରେ ପରିସମାପ୍ତି ଘଟିବ ।
ଉତ୍କଳରେ ଜନ୍ମ ନେଇ ହରିନାମ ପ୍ରଚାର ସହ ସମଗ୍ର ପୃଥିବୀରେ 64ଟି ମଠ ଓ ସନାତନ ଧର୍ମକୁ ୟୁରୋପୀୟ ଦେଶମାନଙ୍କରେ ପ୍ରଚାର ପ୍ରସାର କରାଇଥିଲେ ଶ୍ରୀଳ ପ୍ରଭୁପାଦ । ୧୮୭୪ ମସିହା ଫେବୃଆରୀ ୬ ତାରିଖରେ ଶ୍ରୀଧାମ ପୁରୀଠାରେ ତାଙ୍କର ଦିବ୍ୟ ଆବିର୍ଭାବ ହୋଇଥିଲା । ୧୯୩୭ ମସିହା ଜାନୁଆରୀ ୧ ତାରିଖ କୋଲକାତାର ବାଗବଜାର ସ୍ଥିତ ଗୌଡ଼ିୟ ମିଶନର ମୁଖ୍ୟାଳୟରେ ସେ ସ୍ଵଧାମ ପ୍ରାପ୍ତି ହୋଇଥିଲେ । ଶ୍ରୀଳ ଭକ୍ତିସିଦ୍ଧାନ୍ତ ସରସ୍ୱତୀ ଗୋସ୍ୱାମୀ ପ୍ରଭୁପାଦଙ୍କ ଆବିର୍ଭାବର 150 ବର୍ଷ ପୂର୍ତ୍ତି ଉପଲକ୍ଷେ ତାଙ୍କୁ ଶ୍ରଦ୍ଧାଞ୍ଜଳି ଦିଆଯିବ ।
ରାଷ୍ଟ୍ରପତି ରାମନାଥ କୋବିନ୍ଦଙ୍କ ଉପସ୍ଥିତିରେ ୨୦୨୨ ଫେବୃୟାରୀ ୨୦ ତାରିଖରେ ଶ୍ରୀଧାମ ପୁରୀରେ ଉଦଘାଟନୀ ସମାରୋହ ଆରମ୍ଭ ହେବ ଏବଂ ୨୦୨୫ ଫେବୃଆରୀରେ ଏକ ବିଶାଳ କାର୍ଯ୍ୟକ୍ରମ ସହ କୋଲକାତାରେ ଏହାର ପରିସମାପ୍ତି ଘଟିବ । ଗୌଡ଼ିୟ ମିଶନ ଓ ଶ୍ରୀକ୍ଷେତ୍ର ସାରସ୍ଵତ ଗୌଡ଼ୀୟ ବୈଷ୍ଣବ ସଂଘ, ପୁରୀ ଦ୍ବାରା ଉଦ୍ଘାଟନୀ ସମାରୋହ ଆୟୋଜିତ ହେବ ବୋଲି ଶୁକ୍ରବାର ସାମ୍ବାଦିକ ସମ୍ମିଳନୀରେ କୁହାଯାଇଛି । ଏଥିସହ ପୁରୀଠାରେ ଶ୍ରୀଳ ପ୍ରଭୁପାଦଙ୍କ ଏକ ପ୍ରତିମୂର୍ତ୍ତି ନିର୍ମାଣ ପାଇଁ ଦାବି କରାଯାଇଛି ।
ଭୁବନେଶ୍ବରରୁ ମନୋରଞ୍ଜନ ଶଙ୍ଖୁଆ, ଇଟିଭି ଭାରତ
