ଭୁବନେଶ୍ବର: ଏମିତି ବି ଆସେ ମୃତ୍ୟୁ । ବିମାନ ଯାତ୍ରା ସମୟରେ ଅସୁସ୍ଥତା ପରେ ଜଣେ ଯାତ୍ରୀଙ୍କ ମୃତ୍ୟୁ ହୋଇଛି । ଏଭଳି ଘଟଣା ଦେଖିବାକୁ ମିଳିଛି ଭୁବନେଶ୍ବର ବିମାନବନ୍ଦରରେ ।
ସୂଚନାନୁସାରେ, ଚେନ୍ନାଇ-କୋଲକାତା ସ୍ପାଇସ ଜେଟ୍ ବିମାନ ଶନିବାର ଭୁବନେଶ୍ବର ବିଜୁ ପଟ୍ଟନାୟକ ବିମାନବନ୍ଦରରେ ଜରୁରୀ ଅବତରଣ କରିଥିଲା । SG623D ବିମାନ ଚେନ୍ନାଇ ବିମାନବନ୍ଦରରୁ କୋଲକାତା ସୁବାଶ ଚନ୍ଦ୍ର ବୋଷ ବିମାନବନ୍ଦର ଅଭିମୁଖେ ଉଡାଣ ଭରିଥିଲା । ଏହି ସମୟରେ ବିମାନରେ ଥିବା ଯାତ୍ରୀ ଅଶୋକ କୁମାର ଶର୍ମା ଅସୁସ୍ଥତା ଅନୁଭବ କରିଥିଲେ । ଫଳରେ ବିମାନକୁ ଜରୁରୀ ଅବତରଣ ପାଇଁ ନିଷ୍ପତ୍ତି ନିଆଯାଇଥିଲା ।
ଭୁବନେଶ୍ବର ନିକଟ ବିମାନବନ୍ଦର ହୋଇଥିବାରୁ ପାଇଲଟ ଦିନ 11.30ରେ ବିମାନକୁ ସେଠାରେ ଅବତରଣ କରାଇଥିଲେ । ସେଠାରୁ ତାଙ୍କୁ ଆମ୍ବୁଲାନ୍ସ ଯୋଗେ ଭୁବନେଶ୍ବର ସ୍ଥିତ ଆପୋଲୋ ହସ୍ପିଟାଲକୁ ନିଆଯାଇଥିଲା । ମାତ୍ର ଡାକ୍ତରଖାନାରେ ତାଙ୍କର ମୃତ୍ୟୁ ହୋଇଥିବା ଜଣାପଡିଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
