ଭୁବନେଶ୍ବର: ଓଡିଶା ବିଧାନସଭା ପକ୍ଷରୁ 2008-09 ମସିହାରେ ପୁରୀରେ ଏକ ଗେଷ୍ଟ ହାଉସ ନିର୍ମାଣ ପାଇଁ 80 ଲକ୍ଷ ଟଙ୍କା ପ୍ରଦାନ କରାଯାଇଥିଲା । ହେଲେ ସେଠାରେ ଥିବା ଗେଷ୍ଟ ହାଉସର କୌଣସି ସୂଚନା ନଥିବା କଥା ବାଚସ୍ପତି ସୂର୍ଯ୍ୟ ନାରାୟଣ ପାତ୍ର କହିଛନ୍ତି ।
ପୁରୀ ବିଧାନସଭା ଗେଷ୍ଟ ହାଉସର ତଥ୍ୟ ନାହିଁ
ଏ ସଂପର୍କରେ ୱାର୍କସ୍ ବିଭାଗର ବରିଷ୍ଠ ଅଧିକାରୀମାନଙ୍କ ସହ ବାଚସ୍ପତି ଆଲୋଚନା କରିଛନ୍ତି । ଏହି କୋଠାର ସ୍ଥିତି ଅନୁଧ୍ୟାନ କରାଯିବା ପରେ ଆବଶ୍ୟକୀୟ ମରାମତି କରାଯାଇ ଗେଷ୍ଟ ହାଉସ କରାଯିବ ବୋଲି ବାଚସ୍ପତି ପ୍ରକାଶ କରିଛନ୍ତି ।
ସୂଚନା ଅନୁସାରେ, ପୂର୍ବତନ ବାଚସ୍ପତି କିଶୋର ମହାନ୍ତିଙ୍କ ସମୟରେ ପୁରୀ ନୋଳିଆ ସାହି ଅଞ୍ଚଳରେ 80 ଲକ୍ଷ ଟଙ୍କା ବ୍ୟୟରେ ଏକ କୋଠା ନିର୍ମିତ ହୋଇଥିଲା । ତେବେ ବର୍ତ୍ତମାନ ସମୟରେ ଏହି କୋଠା କାହା ଅଧିନରେ ରହିଛି ଓ କେଉଁ ଅବସ୍ଥାରେ ରହିଛି ସେ ବିଷୟରେ କୌଣସି ତଥ୍ୟ ନାହିଁ ବୋଲି ବାଚସ୍ପତି କହିଛନ୍ତି ।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ
