ଭୁବନେଶ୍ବର: ରାଜ୍ୟ ରାଜଧାନୀରେ ଆଉ ରହିବନି ଟ୍ରାଫିକ ସମସ୍ୟା । ସାଧାରଣ ଲୋକଙ୍କୁ ରାସ୍ତାରେ କି ଟ୍ରାଫିକ ପୋଷ୍ଟରେ ଆଉ ଅଧିକ ସମୟ ଅପେକ୍ଷା କରିବାକୁ ପଡିବ ନାହିଁ । କାରଣ ଆଜି ଭୁବନେଶ୍ବରରେ ପ୍ରତିଷ୍ଠା ହୋଇଛି ଦ୍ବିତୀୟ ଟ୍ରାଫିକ ଥାନା ।
ଭୁବନେଶ୍ବରର ଚନ୍ଦ୍ରଶେଖରପୁର ପୋଲିସ ଷ୍ଟେସନ ନିକଟରେ ଏହି ନୂତନ ଟ୍ରାଫିକ ଥାନା ପ୍ରତିଷ୍ଠା ହୋଇଛି। ଆଜି ଏକ ସ୍ବତନ୍ତ୍ର ଉତ୍ସବରେ ରାଜ୍ୟ ପୋଲିସ ଡିଜି ବିକେ ଶର୍ମା, ପୋଲିସ କମିଶନର ସୁଧାଂଶୁ ଷଡଙ୍ଗୀ, ଟ୍ରାଫିକ ଡିସିପି ସାଗରିକା ନାଥଙ୍କ ସମେତ ବିଭିନ୍ନ ଥାନା ଅଧିକାରୀ ଯୋଗଦେଇଥିଲେ।
ବୁଧବାର ପ୍ରତିଷ୍ଠା ହୋଇଥିବା ନୂତନ ଟ୍ରାଫିକ ଥାନା ଅଧିନରେ ଚନ୍ଦ୍ରଶେଖରପୁର , ଜଟଣି-ଖଣ୍ଡଗିରି, ତମାଣ୍ଡୋ, ନୟାପଲି, ନନ୍ଦନକାନନ, ଇନଫୋସିଟି ଓ ଚନ୍ଦକା ଆଦି ଥାନାରେ ସମସ୍ତ ସମସ୍ୟାର ସମାଧାନ ଏଠାରେ ହିଁ କରିବେ । ପ୍ରାରମ୍ଭିକ ପର୍ଯ୍ୟାୟରେ ଏହି ନୂତନ ଥାନାକୁ ଜଣେ ଇନିସ୍ପେକ୍ଟର, ୬ ଜଣ ସବ-ଇନିସ୍ପେକ୍ଟର, ୧୦ ଜଣ ଏଏସଆଇଓ ୧୨୦ ଜଣ କନଷ୍ଟେବଳଙ୍କୁ ନିୟୋଜିତ କରାଯାଇଛି । ଏହାସହ ଗୋଟିଏ ଭ୍ୟାନ ସହ ପାଟ୍ରୋଲିଂ ପାଇଁ ବାଇକ ପିସିଆର ମଧ୍ୟ ଯୋଗାଇ ଦିଆଯାଇଛି । ସମସ୍ତ କର୍ମଚାରୀମାନେ ଦ୍ବିତୀୟ ଟ୍ରାଫିକ ଥାନା ଅଧିନରେ ଆସୁଥିବା ସମସ୍ତ ଥାନା ଅଞ୍ଚଳରେ ଟ୍ରାଫିକ ପରିଚାଳନା କରିବେ।
ବର୍ତ୍ତମାନ କମିସନରେଟ ପୋଲିସ ଅଧିନରେ ଭୁବନେଶ୍ବରରେ 2ଟିଓ କଟକରେ ଗୋଟିଏ ମୋଟ ଉପରେ 3ଟି ଟ୍ରାଫିକ ଥାନା କାର୍ଯ୍ୟକ୍ଷମ ହେବ । ଜଣେ ଟ୍ରାଫିକ ଡିସିପିଙ୍କ ନେତୃତ୍ବରେ ଦୁଇଜଣ ଏସିପି ଓ 3ଜଣ ଆଇଆଇସି ଟ୍ରାଫିକ ପରିଚାଳନା କରୁଛନ୍ତି।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
