ଭୁବନେଶ୍ବର: ଆଜି ବିଧାନସଭାରେ ରାଜ୍ୟର ଶିକ୍ଷା ବ୍ୟବସ୍ଥାକୁ ନେଇ ଗଣଶିକ୍ଷା ମନ୍ତ୍ରୀଙ୍କୁ ପ୍ରଶ୍ନ ପଚାରିଛନ୍ତି ବିଧାୟକ ପ୍ରଫୁଲ୍ଲ ସାମଲ । ସେ ରାଜ୍ୟର ପ୍ରଥମରୁ ଦ୍ବାଦଶ ଶ୍ରେଣୀ ପର୍ଯ୍ୟନ୍ତ ଚାଲୁଥିବା ଶିକ୍ଷା ବ୍ୟବସ୍ଥାକୁ ନେଇ ପ୍ରଶ୍ନ କରିଛନ୍ତି । ବିଧାନସଭାରେ ବିଜେଡି ବିଧାୟକ ପ୍ରଫୁଲ୍ଲ ସାମଲ ଛାତ୍ରଛାତ୍ରୀ ଅନୁପାତ ସହ କେତେ ବିଦ୍ୟାଳୟ ରହିଛି ଏବଂ କେତେ ପ୍ରାଥମିକ ବିଦ୍ୟାଳୟ,ଉଚ୍ଚ ପ୍ରାଥମିକ ବିଦ୍ୟାଳୟ,ଉଚ୍ଚ ମାଧ୍ୟମିକ ବିଦ୍ୟାଳୟ ନେଇ ପ୍ରଶ୍ନ କରିଛନ୍ତି । ଏହା ସହ ଯୁକ୍ତ ଦୁଇ ଜୁନିୟର କଲେଜ ଓ ଅଧାରୁ ପାଠ ଛାଡୁ ଥିବା ଛାତ୍ରଛାତ୍ରୀଙ୍କୁ ନେଇ କଣ ପଦକ୍ଷେପ ନିଆଯାଉଛି ସେ ନେଇ ପ୍ରଶ୍ନ କରିଛନ୍ତି ।
ରାଜ୍ୟର ପ୍ରାଥମିକ ଶିକ୍ଷା ସହ ମାଧ୍ୟମିକ ଶିକ୍ଷା ବ୍ୟବସ୍ଥାକୁ ନେଇ ଉତ୍ତର ରଖିଛନ୍ତି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାସ । ରାଜ୍ୟରେ ସମୁଦାୟ 33340 ପ୍ରାଥମିକ ବିଦ୍ୟାଳୟ ଅଛି ଏବଂ ଏଥିରେ 14,19,964 ଜଣ ଛାତ୍ରଛାତ୍ରୀ ଅଧ୍ୟୟନ କରୁଛନ୍ତି । ସେହିପରି ରାଜ୍ୟରେ 21,719ଟି ଉଚ୍ଚ ପ୍ରାଥମିକ ବିଦ୍ୟାଳୟ ରହିଛି ଓ ସେଥିରେ ସମୁଦାୟ 2804594 ଜଣ ଛାତ୍ରଛାତ୍ରୀ ଅଧ୍ୟୟନ କରୁଛନ୍ତି । ରାଜ୍ୟରେ ମୋଟ 8076 ଟି ଉଚ୍ଚ ମାଧ୍ୟମିକ ବିଦ୍ୟାଳୟ ରହିଛି ଓ ସେଥିରେ 11,03,740 ଛାତ୍ରଛାତ୍ରୀ ଅଧ୍ୟୟନ କରୁଛନ୍ତି । ରାଜ୍ୟରେ 2032ଟି +2 ଜୁନିୟର ମହାବିଦ୍ୟାଳୟ ଅଛି ସେଥିରେ 687586 ଜଣ ଛାତ୍ରଛାତ୍ରୀ ଅଧ୍ୟୟନ କରୁଛନ୍ତି ।
ପ୍ରାଥମିକ ସ୍ତରରେ ଅଧାରୁ ପାଠ ଛାଡୁଥିବା ଛାତ୍ରଛାତ୍ରୀ ମାନଙ୍କ ପାଇଁ ସରକାରଙ୍କ ତରଫରୁ ନିଆଯାଉଛି । ସମଗ୍ର ଶିକ୍ଷା ମାଧ୍ୟମରେ ବିଭିନ୍ନ ସରକାରୀ କାର୍ଯ୍ୟକ୍ରମ କରାଯାଉଛି । ମାଧ୍ୟମିକ ସ୍ତରରେ ଡ୍ରପ ଆଉଟ ରୋକିବା ପାଇଁ ସରକାରଙ୍କ ତରଫରୁ ନିଆଯାଇଥିବା ପଦକ୍ଷେପ ଗୁଡିକ ହେଲା ଛାତ୍ରଛାତ୍ରୀଙ୍କୁ ସାଇକେଲ ଯୋଜନା ସହ ଆଦିବାସୀ ଛାତ୍ରଛାତ୍ରୀ ମାନଙ୍କୁ ସ୍କୁଲ ଫି ଛାଡ ସହ ମାଗଣା ପାଠ୍ୟପୁସ୍ତକ ଯୋଗାଇବା ସହ ଷ୍ଟାଇପେଣ୍ଡ ଯୋଗାଇ ଦିଆଯାଉଛି । +2 କଲେଜରେ ଛାତ୍ରଛାତ୍ରୀ ସଂଖ୍ୟା ହ୍ରାସକୁ ଡ୍ରପ ଆଉଟ କୁହାଯାଇ ନ ପାରେ କାରଣ ଏହି ସମୟରେ ବହୁତ ଛାତ୍ରଛାତ୍ରୀ ଡିପ୍ଲୋମା ଏଏନଏମ ଆଇଟିଆଇ ପ୍ରଭୃତି ପାଠ୍ୟକ୍ରମରେ ଯୋଗଦେଉଛନ୍ତି ।
ଭୁବନେଶ୍ବରରୁ ତପନ କୁମାର ଦାସ,ଇଟିିଭି ଭାରତ
