ଭୁବନେଶ୍ବର: ପରିମଳ ବ୍ୟବସ୍ଥାରେ ସୁଧାର ଆଣିବା ପାଇଁ କେନ୍ଦ୍ର ଏବଂ ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ଯୋଜନା କାର୍ଯ୍ୟକାରୀ କରାଯାଉଛି । ଅନେକ ସଚେତନତାମୂଳକ କାର୍ଯ୍ୟକ୍ରମ ମଧ୍ୟ ଗ୍ରହଣ କରାଯାଉଛି । ମାତ୍ର ରାଜ୍ୟରେ ଥିବା ସରକାରୀ ଶିକ୍ଷାନୁଷ୍ଠାନରେ ପରିମଳ ବ୍ୟବସ୍ଥା ଫେଲ୍ ମାରିଥିବା ଜଣାପଡିଛି ।
ସ୍କୁଲରେ ଉପଲବ୍ଧ ହେଉଥିବା ଶୌଚାଳୟ ବ୍ୟବସ୍ଥା ସମ୍ପର୍କରେ ଗୃହକୁ ଅବଗତ କରିଛି ରାଜ୍ୟ ଗଣଶିକ୍ଷା ବିଭାଗ । ବିଭାଗୀୟ ମନ୍ତ୍ରୀଙ୍କ ପକ୍ଷରୁ ପରିବହନ ମନ୍ତ୍ରୀ ପଦ୍ମନାଭ ବେହେରା ଗୃହରେ ଏ ସମ୍ପର୍କରେ ଉତ୍ତର ରଖିଛନ୍ତି । ରାଜ୍ୟରେ ଥିବା 441ଟି ବାଳିକା ଏବଂ 1485ଟି ବାଳକ ବିଦ୍ୟାଳୟରେ ପାଇଖାନାର ସୁବିଧା ନାହିଁ ।
ରାଜ୍ୟରେ ମୋଟ 54298ଟି ସରକାରୀ ସ୍କୁଲ ରହିଛି । ବାଳିକାଙ୍କ ପାଇଁ 53, 763ଟି ଏବଂ ବାଳକଙ୍କ ପାଇଁ 52521ଟି ଶୌଚାଳୟ ଉପଲବ୍ଧ ରହିଛି । ହେଲେ ସବୁ ସ୍କୁଲରେ ପାନୀୟ ଜଳର ବ୍ୟବସ୍ଥା ରହିଛି। ଯେଉଁଠାରେ ଏ ସୁବିଧା ନାହିଁ, ସେଠାରେ ମାଠିଆ ପାଣିର ବ୍ୟବସ୍ଥା ରହିଛି ।
ଏଥିସହିତ ଆହୁରି ମଧ୍ୟ ଗୃହକୁ ଜଣାଇ ଦିଆଯାଇଛି, 2003-04ରେ ଶୌଚାଳୟ ନିର୍ମାଣ ପାଇଁ 20 ହଜାର ଟଙ୍କା ଖର୍ଚ୍ଚ ହେଉଥିଲା । ମାତ୍ର 2018-19ରେ ଏହା ବଢି 1 ଲକ୍ଷ 78 ହଜାର ଟଙ୍କାରେ ପହଞ୍ଚିଛି। ଫନି ବାତ୍ୟା ଯୋଗୁଁ ସ୍କୁଲରେ ଥିବା କେତେ ଶୌଚାଳୟ ଭାଙ୍ଗିଛି ସେ ନେଇ କୌଣସି ତଥ୍ୟ ଗୃହରେ ଦେଇପାରି ନାହାଁନ୍ତି ରାଜ୍ୟ ସରକାର ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
