ଭୁବନେଶ୍ବର: ସରିଛି ପ୍ରଥମ ପର୍ଯ୍ୟାୟ ମତଦାନ । କାଁ ଭାଁ ଗଣ୍ଡଗୋଳ ତଥା ଇଭିଏମ୍ ତ୍ରୁଟିକୁ ଛାଡିଦେଲେ ରାଜ୍ୟରେ ଶାନ୍ତି ଶୃଙ୍ଖଳାର ସହ ନିର୍ବାଚନ ଶେଷ ହୋଇଛି । ତେବେ 2ଟି ବୁଥ୍ରେ ସାନି ନିର୍ବାଚନ ହେବ ବୋଲି ସୂଚନା ଦେଇଛନ୍ତି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ସୁରେନ୍ଦ୍ର କୁମାର ।
ରାଜ୍ୟରେ ଗତକାଲି 4ଟି ଲୋକସଭା ଓ 28ଟି ବିଧାନସଭା ଆସନ ପାଇଁ ଭୋଟ୍ ଗ୍ରହଣ ହୋଇଛି । ତେବେ ଦୁଇଟି ବୁଥ ପାଇଁ ଆଉ ଥରେ ନିର୍ବାଚନ ହେବ । ଏନେଇ ନିର୍ବାଚନ କମିଶନଙ୍କ ଅନୁମତି ମଗାଯାଇଛି ବୋଲି କହିଛନ୍ତି ମୁଖ୍ୟ ନିର୍ବାଚନ ଅଧିକାରୀ ।
ସାନି ନିର୍ବାଚନ ପାଇଁ ପ୍ରସ୍ତାବ ଦିଆଯାଇଥିବା 2ଟି ବୁଥ୍ ମାଲକାନଗିରି ଓ ବ୍ରହ୍ମପୁରରେ ରହିଛି । ଏଥିରୁ ଗୋଟିଏରେ ଇଭିଏମ୍ ଫୋପାଡି ଦିଆଯାଇଥିବା ବେଳେ ଆଉ ଗୋଟିଏ ବୁଥ୍ରେ ପ୍ରିଜାଇଡିଂ ଅଫିସରଙ୍କ ତ୍ରୁଟି ଥିଲା । ପର୍ଯ୍ୟବେକ୍ଷକଙ୍କ ତଥ୍ୟକୁ ଆଧାର କରି ଏହି ନିଷ୍ପତ୍ତି ନିଆଯାଇଛି ବୋଲି ଗଣମାଧ୍ୟମକୁ କହିଛନ୍ତି ସୁରେନ୍ଦ୍ର କୁମାର । ତେବେ ଅନ୍ୟ ଅଭିଯୋଗ ହୋଇଥିବା ବୁଥ୍ରେ ତର୍ଜମା ଚାଲିଛି ବୋଲି ସେ ସୂଚନା ଦେଇଛନ୍ତି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
