ବନସ୍ତେ ଡାକିଲା ଗଜ..
ବରଷକେ ଥରେ ଆସିଛି ରଜ...
ଆସିଛି ରଜ ଲୋ ଘେନି ନୂଆ ସଜବାଜ....
ଆଜି ହେଉଛି ପହିଲି ରଜ । ଏହା ହେଉଛି ଓଡିଶାର ଏକ ଗଣପର୍ବ । ରଜପର୍ବ ଚାରି ଦିନ ଧରି ପାଳନ କରାଯାଏ । ରଜର ପୂର୍ବ ଦିନକୁ ମାସନ୍ତ ବା ସଜବାଜ, ପ୍ରଥମ ଦିନକୁ ପହିଲି ରଜ, ଦ୍ବିତୀୟ ଦିନକୁ ରଜ ସଂକ୍ରାନ୍ତି ଭାବେ ଓ ଶେଷ ରଜକୁ ବସୁମତୀ ସ୍ନାନ ଭାବେ ଜଣାଯାଏ । ରଜକୁ କୃଷି ଭିତ୍ତିକ ପର୍ବ ଭାବେ ବୋଲି ମଧ୍ୟ ଜଣାଯାଏ । ଏହା ଚାଷ ଆରମ୍ଭକୁ ସୂଚାଏ । ରଜ ଶବ୍ଦର ଆକ୍ଷରିକ ଅର୍ଥ ହେଉଛି ରଜବତୀ ହେବା ଯାହା ଧରିତ୍ରୀ ମାତା ନିଜେ ରଜସ୍ବଳା ହୋଇ ନିଜ ସନ୍ତାନ ପାଇଁ ଶସ୍ୟ ଉତ୍ପାଦନ କ୍ଷମତା ବଢାଏ ।
ତେବେ ଏହି ପରମ୍ପରା କାହିଁ କେଉଁ ପୁରାତନ କାଳରୁ ଚାଲି ଆସୁଛି । ଏହି ଦିନ ଗାଁ ଠୁ ସହର ସବୁଠି ଧୂମଧାମରେ ରଜ ପାଳିତ ହୋଇଥାଏ । ସବୁ କୁଆଁରୀ ଝିଅ ମାନେ ସଜ ବାଜ ହୋଇ, ନୂଆ ଡ୍ରେସ ପିନ୍ଧି ଦୋଳି ଖେଳିଥାନ୍ତି । ଘରେ ଘରେ ପୋଡ ପିଠା ଓ ଅନ୍ୟାନ୍ୟର ପିଠା ପଣାର ଆସର ଜମେ । ଏହି ଦିନ ରଜ ପାନର ମଧ୍ୟ ବେଶ ମହତ୍ତ୍ବ ରହିଛି । ଗାଁ ଦାଣ୍ଡରେ ଝିଅ ମାନେ ପୁଚି ଖେଳିଥାନ୍ତି ।
ତେବେ ବର୍ତ୍ତମାନ ସମୟରେ କୋରୋନା ମହାମାରୀ କାରଣରୁ ଫିକାପଡିଛି ରଜପର୍ବ । ସରକାରଙ୍କ କଟକଣା କାରଣରୁ କୋଭିଡ ନିୟମ ଅନୁସରଣ କରି ରଜ ପାଳୁଥିବା ଦେଖିବାକୁ ମିଳିଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକଙ୍କ ସହ ବ୍ୟୁରୋ ରିପୋର୍ଟ, ଇଟିଭି ଭାରତ
