ଭୁବନେଶ୍ବର: ମହାମାରୀ କାଳରେ ଛଟପଟ ହେଉଛନ୍ତି ସାଧାରଣ ଲୋକେ । ଜୀବନ ଜୀବିକା ପ୍ରଭାବିତ ହୋଇଥିବା ବେଳେ ରୋଜଗାର ପନ୍ଥା ସମ୍ପୂର୍ଣ୍ଣ ସଟଡାଉନ । କୋରୋନା କାୟା ଦିନକୁ ଦିନ ବଢିଚାଲିଥିବା ବେଳେ ସରକାର ଆକ୍ରାନ୍ତଙ୍କ ଚିକିତ୍ସା ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । ହେଲେ ରାଜ୍ୟର ବିଭିନ୍ନ ପ୍ରାନ୍ତରୁ ରୋଗୀ ଉତ୍ତମ ଚିକିତ୍ସା ପାଇଁ ରାଜଧାନୀର କର୍ପୋରେଟ ହସ୍ପିଟାଲକୁ ଆସୁଛନ୍ତି । ବିଡମ୍ବନାର କଥା ହେଉଛି ଚିକିତ୍ସା ଆଳରେ ଏମାନଙ୍କୁ ପାଖରୁ ଅଧିକ ଅର୍ଥ ଆଦାୟ କରୁଛନ୍ତି ଏହି ହସ୍ପିଟାଲଗୁଡିକ । ଯାହା ରୋଗୀଙ୍କ ଦୁଃଖ ଦୁର୍ଦ୍ଦଶାକୁ ଦ୍ବିଗୁଣିତ କରୁଛି । ଏପରିକି ରୋଗୀର ସମସ୍ତ ଚିକିତ୍ସା ବିବରଣୀ ମଧ୍ୟ ସଠିକ ସମୟରେ ଘର ଲୋକଙ୍କୁ ଅବଗତ କରାଯାଉନାହିଁ ବୋଲି ଅଭିଯୋଗ ଆସିଛି ।
କର୍ପୋରେଟ୍ ହସ୍ପିଟାଲର ଏଭଳି ଅତିଷ୍ଠ ଆଚରଣକୁ ସହଜରେ ଗ୍ରହଣ କରିପାରିନାହାନ୍ତି ଚିକିତ୍ସା ପାଇଁ ଆସୁଥିବା ଶତାଧିକ ଲୋକେ । ସେପଟେ ସରକାରଙ୍କ ନୀରବତାରୁ ସ୍ପଷ୍ଟ ସଙ୍କେତ ମିଳୁଛି କି ହୁଏତ ସରକାରଙ୍କ ନିୟନ୍ତ୍ରଣ ଭିତରେ ନାହାଁନ୍ତି ଏହି ହସ୍ପିଟାଲଗୁଡିକ ? ତେବେ ସରକାର ଚୁପ କାହିଁକି ? ଏଭଳି ଅନେକ ପ୍ରଶ୍ନ ସାଧାରଣରେ ଉଙ୍କି ମାରୁଛି । ଏପରି ହୀନସ୍ତାର ଶିକାର ହୋଇଛନ୍ତି ଭୁବନେଶ୍ବର ଉପକଣ୍ଠରେ ରହୁଥିବା ଜଣେ ବ୍ୟକ୍ତି ।
ସେ ନିଜ ପୁତୁରାକୁ ଭୁବନେଶ୍ବରର ଏକ ଘରୋଇ କର୍ପୋରେଟ ହସ୍ପିଟାଲରେ ଜୁଲାଇ ୨୫ ତାରିଖରେ ଆଡ଼ମିଟ କରିଥିଲେ । ହେଲେ ତାଙ୍କୁ ଗତ 18 ତାରିଖରେ କୋଭିଡ ହସ୍ପିଟାଲକୁ ସ୍ଥାନାନ୍ତରିତ କରାଗଲା । ସେଠାରେ ସେ ୪ ଦିନ ରହିଲା ଭିତରେ ଦିନେ ମଧ୍ୟ ତାଙ୍କ ପରିବାର ସହ ମେଡିକାଲ କର୍ତ୍ତୃପକ୍ଷ ଯୋଗାଯୋଗ କରିନଥିଲେ । କିନ୍ତୁ ହଠାତ ଗତ ୨୪ ତାରିଖରେ ସେ ମୃତ୍ୟୁ ବରଣ କରିଛି ବୋଲି ସୂଚନା ଦିଆଗଲା । ଯାହାକୁ ସହଜରେ ଗ୍ରହଣ କରିପାରିନାହାନ୍ତି ରୋଗୀଙ୍କ ସମ୍ପର୍କୀୟ ।
ତେବେ ଏଭଳି ମାଳ ମାଳ ଅଭିଯୋଗ ରାଜଧାନୀର ବିଭିନ୍ନ ଘରୋଇ ହସ୍ପିଟାଲ ନାଁରେ ଆସୁଛି, ହେଲେ ସରକାର ଏହାକୁ ଶୁଣି ମଧ୍ୟ ଚୁପ ବସିଛନ୍ତି । ଯାହା ସ୍ପଷ୍ଟ କରୁଛି ସରକାରଙ୍କ ନିୟନ୍ତ୍ରଣ ବାହାରେ ଏହି ସମସ୍ତ ହସ୍ପିଟାଲ ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
