ଭୁବନେଶ୍ବର: ଜେଲରେ ପାଓ୍ବାର ଟିଲରରେ ହଳ କରିବେ କଏଦୀ । ୨୨ଟି ଜେଲରେ ତେଲ ପ୍ରୋସେସିଙ୍ଗ ୟୁନିଟ ଖୋଲିବା ନେଇ ସୂଚନା ।
ଜେଲ ଉତ୍ପାଦ ସାମଗ୍ରୀକୁ ଗୁରୁତ୍ଵ ଦେଇଛନ୍ତି ସରକାର । ଉତ୍ପାଦନ ବୃଦ୍ଧି ପାଇଁ ଏଣିକି ପାଓ୍ବାରଟିଲରରେ ହଳ କରିବେ କଏଦୀ । ୧୫ଟି ଜେଲ ପାଇଁ ପାୱାର ଟିଲର ଦେବାକୁ ହୋଇଛି ବ୍ୟବସ୍ଥା । ଏଥିସହ ୨୨ଟି ଜେଲରେ ରହିବ ତେଲ ପ୍ରୋସେସିଙ୍ଗ ୟୁନିଟ ।
୩୦ ଜିଲ୍ଲାର ମୁଖ୍ୟାଳୟରେ ଥିବା ଜେଲରେ ରହିବ ଫୁଡ଼ ପ୍ରୋସେସିଙ୍ଗ ୟୁନିଟ । ଫଳରେ ଜେଲରୁ ଉତ୍ପାଦ ସାମଗ୍ରୀକୁ ପ୍ରାଧାନ୍ୟ ପାଇଁ ରାଜ୍ୟ ସରକାର ଏ ନେଇ ଜେଲ ବିଭାଗକୁ ଅନୁମତି ଦେଇଛନ୍ତି । ଜେଲର ସୁରକ୍ଷା ଦୃଷ୍ଟିରୁ ଜେଲ ଭିତରକୁ ମୋବାଇଲ ଓ ଡ୍ରଗ୍ସ ପ୍ରଵେଶ ଉପରେ ରୋକ ଲଗାଇବାକୁ ଡିପ ସର୍ଚ ମେଟାଲ ଡିଟେକ୍ଟର ଲଗାଯିବ। ଜେଲ ଭିତରେ ବ୍ୟବହାର ହେବ ବଡି କ୍ୟାମେରା, ଫଳରେ ଜେଲ ଭିତରେ ହେଉଥିବା କାର୍ଯ୍ୟକଳାପ ଉପରେ ରୋକ ଲାଗିପାରିବ।
ଚୌଦ୍ବାର ଓ ଭୁବନେଶ୍ବର ଜେଲରେ ୨୦ଟି କ୍ୟାମେରା ପାଇଲଟ ପ୍ରୋଜେକ୍ଟ ଭାବେ ବ୍ୟବହାର ହେବ। ପରବର୍ତ୍ତୀ ସମୟରେ ଅନ୍ୟ ଜେଲରେ ମଧ୍ୟ ବ୍ୟବହାର ହେବ। ଏହାଦ୍ବାରା ଜେଲ ଭିତରେ ଦୁର୍ଦ୍ଦାନ୍ତ ଅପରାଧୀଙ୍କ କାର୍ଯ୍ୟକଳାପ ନଜରରେ ରଖାଯାଇପାରିବ ବୋଲି ଆଶା ରଖାଯାଇଛି । ସେହିପରି ୪୦ଟି ଜେଲରେ ରହିବ ଇ ରିକ୍ସା । ଅସୁସ୍ଥ କଏଦୀଙ୍କ ପାଇଁ ଏହି ଇ ରିକ୍ସା ବ୍ୟବହାର ଉପଯୋଗୀ ହେବ । ଭୁବନେଶ୍ବର ଜେଲରେ ହେବ ୨୦ ବେଡ଼ର ସନଷ୍ଟ୍ରୋକ ଓ ଇସିଜି ବ୍ୟବସ୍ଥା ଥିବା ହସ୍ପିଟାଲ । ପଦ୍ମପୁର, ଜଗତସିଂହପୁର, ସୋରଡା ଓ ଜି ଉଦୟଗିରି ଭଳି ଜେଲରେ ରହିବ ୧୦ ବେଡ଼ର ସୁବିଧା । ୧୩ଟି ଜେଲରେ ଭିଡିଓ କନଫରେନ୍ସିକୁ ଅପଗ୍ରେଡସନ କରାଯିବ। ଯାଦ୍ବାରା ଭିସିରେ କଏଦୀଙ୍କୁ ଅଦାଲତ ସହ ଇ ହାଜର କରାଯାଇ ପାରିବ। ଏହାସହ ୨୦୨୦ ଓ ୨୦୨୧ମସିହାରେ ଆହୁରି ୨୨୦୯ କଏଦୀ ରହିପାରିବା ଭଳି କ୍ଷମତା ବଢାଯାଇଛି ।
ଭୁବନେଶ୍ବରରୁ ତାପସ ପରିଡ଼ା, ଇଟିଭି ଭାରତ
