ଭୁବନେଶ୍ବର: ପାଖେଇ ଆସୁଛି ଗଣେଶ ପୂଜା । ପ୍ରସ୍ତୁତିରେ ଲାଗି ପଡିଛନ୍ତି ସମସ୍ତେ । ଏଥିପାଇଁ ଚଳଚଞ୍ଚଳ ରାଜଧାନୀ । ଗଣପତିଙ୍କୁ ସ୍ବାଗତ କରିବାକୁ ପ୍ରସ୍ତୁତ ସ୍ମାର୍ଟସିଟିବାସୀ ।
ତେବେ ଏଥର ରାଜଧାନୀରେ ଦେଖିବାକୁ ମିଳିବ ଭିନ୍ନ ଭିନ୍ନ ଷ୍ଟାଇଲର ଗଣେଶ ମୂର୍ତ୍ତି । ପାରମ୍ପରିକ ଠାରୁ ଆଧୁନିକତାର ଛାପ । ନୂଆ ନୂଆ ଆକାରରେ ନଜର ଆସିବ ପାର୍ବତୀ ପୁତ୍ର ଗଜାନନ । କେଉଁଠି ଡଙ୍ଗା ଉପରେ ନିଜ ବାହନ ସହ ଆସିବେ ତ ଆଉ କେଉଁଠି ବହି ସହ ମୋବାଇଲ ଧରି । ସେହିପରି କେଉଁଠି ଗରୁଡ ଉପରେ ନିଜର ବାହନ ମୂଷିକକୁ ଧରି ଉଡୁଥିବାର ନଜର ଆସୁଛନ୍ତି ଗଜାନନ ।
ଲୋକଙ୍କୁ ଆକୃଷ୍ଟ କରିବାକୁ ସମସ୍ତ ପ୍ରସ୍ତୁତି କରିସାରିଲେଣି ଆୟୋଜକ କମିଟି । ମୂର୍ତ୍ତି ସହ ମେଢ ନିର୍ମାଣରେ ମଧ୍ୟ ନୂଆ ଲୁକ ଦେବାରେ କରାଯାଇଛି ଚେଷ୍ଟା । କେଉଁଠି ବାଉଁଶର ପେଣ୍ଡାଲ ତ ଆଉ କେଉଁଠି ହିମାଳୟ ପର୍ବତର ପେଣ୍ଡାଲ ଭିତରୁ ଦର୍ଶନ ଦେବେ ବିଘ୍ନହର୍ତ୍ତା ଗଣେଶ । ଛୋଟରୁ ବଡ ସବୁ ଗଣେଶ ମୂର୍ତ୍ତିରେ ରଙ୍ଗ ଦେବାର କାମ ପାଖାପାଖି ଶେଷ ହେବାକୁ ବସିଲାଣି ।
ଭିନ୍ନ ଭିନ୍ନ ମେଢରେ ନିଜ ପେଣ୍ଡାଲ ପ୍ରତି ଆକୃଷ୍ଟ କରିବାକୁ ଆୟୋଜକ କମିଟି ଉଦ୍ୟମ କରିଛନ୍ତି । କିଏ 35 ଫୁଟର ଗଜାନନ ମୂର୍ତ୍ତି ଅର୍ଡର ଦେଉଛି ତ ଆଉ କେଉଁଠି ସଗୁଦାନାର ମୂର୍ତ୍ତି ଅର୍ଡର ମିଳିଛି । ମୂର୍ତ୍ତି କାରିଗର ମଧ୍ୟ ସମସ୍ତ ମୂର୍ତ୍ତିକୁ ଚତ୍ମକାର କରିବାକୁ ସମସ୍ତ ପ୍ରକାର ପ୍ରସ୍ତୁତି କରିଛନ୍ତି ।
ଭୁବନେଶ୍ବରରୁ ଶତରୂପା ସାମନ୍ତରାୟ, ଇଟିଭି ଭାରତ
