ଭୁବନେଶ୍ବର: ବିଜେପି ସାଧାରଣ ସଂପାଦିକା ଲେଖାଶ୍ରୀ ସାମନ୍ତସିଂହାର ଆଜି ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା (BSKY) ସ୍ବାସ୍ଥ୍ୟ ହେଲଥ କାର୍ଡ ବିଜ୍ଞାପନକୁ ନେଇ ସାମ୍ବାଦିକ ସମ୍ମୀଳନୀରେ ରାଜ୍ୟ ସରକାରଙ୍କୁ ଜୋରଦାର ଟାର୍ଗେଟ କରିଛନ୍ତି । ଏହାର ପାଲଟା ଜବାବ ଦେଇଛନ୍ତି ବିଜେଡି ମୁଖପାତ୍ର ଇପ୍ସିତା ସାହୁ ।
ଲୋକଙ୍କ ସୁବିଧା ପାଇଁ ଓଡିଶା ସରକାରଙ୍କ ଦ୍ୱାରା ଯେତେବେଳେ କୌଣସି ଯୋଜନା କିମ୍ବା କାର୍ଯ୍ୟକ୍ରମ ଆରମ୍ଭ ହୁଏ ସେତେବେଳେ ଓଡିଶା ବିଜେପି ବିରୋଧ କରିଛି । ବିଜେପି ନେତ୍ରୀ ଲେଖାଶ୍ରୀ ସାମନ୍ତସିଂହାରଙ୍କ ଭଳି ବ୍ୟକ୍ତିଙ୍କ ଜରିଆରେ ନିମ୍ନ ରୁଚିର ଭାଷା ପ୍ରୟୋଗ କରି ଏଭଳି ଯୋଜନାକୁ ସମାଲୋଚନା କରିଥାନ୍ତି ବୋଲି ବିଜେଡି ପ୍ରବକ୍ତା ଇପ୍ସିତା ସାହୁ କହିଛନ୍ତି । ବିଜେପି ସାମ୍ବାଦିକ ସମ୍ମିଳନୀର ଜବାବ ଦେଇ ଇପ୍ସିତା କହିଛନ୍ତି ଯେ, ବିଜେପି ଶାସିତ ରାଜ୍ୟ ସରକାରମାନେ ‘କାଳିଆ’ ଓ ‘ମମତା’ ଭଳି ଯୋଜନାକୁ ସେମାନଙ୍କ ରାଜ୍ୟ ପାଇଁ କପି କରିଛନ୍ତି । ଖୁବଶୀଘ୍ର ଅନ୍ୟ ରାଜ୍ୟ ମଧ୍ୟ ଓଡିଶାର BSKY ଯୋଜନାକୁ ଅନୁରୂପ ଭାବେ କପି କରିବେ । ତାହା ମଧ୍ୟ ଲେଖାଶ୍ରୀ ଦେଖିବେ । ଓଡିଶାବାସୀ ଭଲଭାବେ ଜାଣିଛନ୍ତି ଯେ, ବିଜେଡି ସରକାର ସେମାନଙ୍କ କଲ୍ୟାଣ ପାଇଁ ପଦକ୍ଷେପ ନେଉଛନ୍ତି । ଆଉ ଓଡିଶା ବିଜେପି ଏବଂ ଲେଖାଶ୍ରୀ ସାମନ୍ତସିଂହାର ଶସ୍ତା ରାଜନୀତି କରୁଛନ୍ତି ।
ଓଡିଶାବାସୀ ଏହା ଭଲଭାବେ ହୃଦୟଙ୍ଗମ କଲେଣି । ଖୁବ୍ଶୀଘ୍ର ଓଡିଶା ବିଜେପି ଏବଂ ଲେଖାଶ୍ରୀ ସାମନ୍ତସିଂହାର ଦେଖିବେ BSKY ଯୋଜନା କେତେ ଲାଭଦାୟକ । ସେତେବେଳେ ସେମାନଙ୍କୁ ଆଜିର ବିବୃତ୍ତି ପାଇଁ ଅନୁତାପ କରିବାକୁ ପଡିବ ବୋଲି ଇପ୍ସିତା କହିଛନ୍ତି ।
ଭୁବନେଶ୍ବରରୁ ଭବାନୀଶଙ୍କର ଦାସ,ଇଟିଭି ଭାରତ
